Trés chiques, de 18, 19 y 20 años, resultaron mancaes en sufriendo una salida de vía y un entorno’l coche nel que circulaben pola Nacional 625, en La Vega los Caseros, en Parres.
Según los datos facilitaos pol Serviciu d’Atención Médica Urxente (SAMU) dos de les afectaes, que presentaben contusiones de calter leve, fueron treslladaes al Hospital Comarcal del Oriente, y otra de les accidentaes, que presentaba un traumatismu craneoencefálico, foi sacupada al Hospital Universitariu Central d’Asturies (HUCA). Por cuenta de más pruebes y hasta nueva valoración médica’l so pronósticu ye reserváu.
El Centru de Coordinación d’Emerxencies recibió l’avisu a les 6:20 hores. Na llamada d’alerta esplicóse que salieren de Cangues d’Onís y sufrieren un accidente. De momentu movilizóse a 3 efectivos de Bomberos del Serviciu d’Emerxencies del Principáu d’Asturies (SEPA), con base en Cangues d’Onís, que se treslladaron col furgón multisocorro y el vehículu primera salida.
N’alcontrando’l turismu accidentáu, matrícula 2859 HHV, que se saliera de la calzada, unos 50 metros, y entornar sobre’l techu del mesmu, los bomberos comprobaron qu’una de les ocupantes pudiera salir del so interior, ente qu’otros dos taben atrapaes. La dotación dio en alzar el vehículu con unos puntales pa poder aportar a les accidentaes, una y bones ésti entornara sobre’l techu entartallándolo. De siguío retiraron la puerta trasera derecha del coche y quitaron los respaldos de los asientos pa, n’inmovilizando col collarín a les afectaes, sacales del interior del automóvil cola tabla de rescate.
Los bomberos dieron per rematada la intervención a la so llegada a base, a les 8:03 hores. La sala del 112 del SEPA comunicó’l sucesu a la Guardia Civil, a la Policía Local de Cangues d’Onís y al Serviciu d’Atención Médica Urxente (SAMU) que movilizó la UVI-Móvil de Les Arriondes y l’ambulancia de Cangues d’Onís.
