El Gobiernu de Corvera va empecipiar esti martes, día 3 de noviembre, la ronda d’asamblees abiertes ciudadanes que se van celebrar en tol conceyu, pa esponer a los vecinos y vecines les grandes cifres del presupuestu municipal pa 2016 y percanciar les sos suxerencies al respective. “Tal que vinimos faciendo, en Corvera queremos que los presupuestos sían participativos y que sían reflexu de la realidá del conceyu. Tenemos un proyectu políticu recoyíu nel nuesu programa que recibió l’enfotu de los vecinos pero tamién una de les señes d’identidá del nuesu Gobiernu ye la tresparencia y la participación, por ello vamos informar abiertamente n’asamblees ciudadanes de tola información de la que disponemos y vamos tomar nota de les propuestes y suxerencies que nos faiga la ciudadanía. Ye la nuesa forma de faer política y d’aseguranos de que les futures actuaciones municipales resuelven los problemes reales de la xente”, señaló Iván Fernández, Alcalde de Corvera.
En total, el Gobiernu va celebrar siete asamblees abiertes ciudadanes sobre presupuestos participativos, una per cada parroquia del conceyu. va convidar al movimientu vecinal a allegar a eses Asamblees Abiertes y tamién se van poner cartelos p’anunciar estes asamblees. La ronda va dar empiezu esti martes, a les 17:30 hores, nel Centru Cultural de Los Campos y, a les 19:15 hores, nel Centru Tomás y Valiente de Les Vegues. El miércoles día 4, los vecinos y vecines tán convocaos a les 17:30 hores nel Centru Cultural de Trasona; a les 19:00 hores na see de l’Asociación de Vecinos de Villa y a les 20:15 hores na pista polideportiva de Molleda. El xueves día 5, les asamblees van celebrar a les 18:30 hores nel Centru Cultural de Cancienes y a les 19:45 hores nel local de l’Asociación de Vecinos de Solís.
“Antes de ser nomáu alcalde anuncié que les cais de Corvera seríen el mio despachu, ye lo que faigo acaldía y sigo faciendo a la d’ellaborar los presupuestos. Quiero que los corveranos sepan de primera esquito cuál ye la situación económica municipal, esplica-yos en que se gastar el dineru público porque ye daqué que-yos pertenez y tamién escuchar les sos suxerencies y opiniones”, añedió Iván Fernández. D’esta forma, nel intre de les asamblees, el Gobiernu corveranu va informar de que’l puntu de partida ye’l techu d’ingresos del Conceyu pa 2016, que s’asitia nos 12,7 millones d’euros, teniendo en cuenta que d’éstos, 5,4 millones –el 42,5 per cientu del total- van destinaos a cubrir gastos de personal. Otros factores a tener en cuenta van ser “que los impuestos y tases lleven conxelaos trés años y que, gracies a nuesa bona xestión económica amenorguemos la delda municipal un 70 per cientu nos postreros 4 años y eso anicia que pa 2016 vamos destinar namá 237.000 euros pal pagu de la delda, frente a los 645.000 euros que se destinaben con anterioridá”, destacó Iván Fernández. “Un exemplu evidente de que la bona xestión económica trai los sos frutos” apuntilló l’alcalde.
Paralelamente a la celebración de les asamblees abiertes ciudadanes, el mesmu martes día 3 de noviembre, el Gobiernu va aprovechar la celebración de la Comisión Informativa de Facienda pa pidir a tolos grupos políticos con representación municipal les sos preferencies, suxerencies y prioridaes de cara a la ellaboración de los nuevos presupuestos.
