L’Asociación Iniciativa pol Asturianu tachó de discriminación anacrónica» y de «falta de respetu bien grave» les declaraciones de Miguel Alarcos, qu’amosó’l so malestar pola llectura d’un poema n’asturianu y que dempués, en Facebook, tachó de «puta mentira de filólogos paletos» lo qu’él considera la variante académica de la llingua asturiana.
Nuna nota de prensa, Iniciativa recuerda amás que la salida de Miguel Alarcos foi nun actu nel que se presentaba’l llibru ‘Homenaxe a los poetes de la cátedra Emilio Alarcos’, qu’inclúi poemes lleíos dos años tras nun actu asemeyáu, y nel que participaron dos poetes con testos n’asturianu: Lluis Xabel Álvarez y Claudia Elena Menéndez.
«Foi la mesma directora de la cátedra Emilio Alarcos, Josefina Martínez, exmujer del llingüista, quien dio’l vistu bonu a José Luis García Martín (organizador del eventu) por que Claudia Elena Menéndez (poeta y filóloga) y Lluis Xabel Álvarez (poeta, filósofu, fundador de Conceyu Bable y académicu de númberu de l’Academia de la Llingua Asturiana) lleeren n’asturianu, anque lo fixo de mala gana. Tenemos noticies tamién de que la directora de la cátedra trató de que nun s’espublizaren poemes n’asturianu dientro d’esti llibru, pero’l sofitu de José Luis García Martín a los dos poetes y al asturianu sirvieron por que en esi llibru apaecieren tolos testos que se lleeron pa homenaxar a los poetes que pasaren pola Catedra Emilio Alarcos», recuerda Iniciativa pol Asturianu.
Según Iniciativa, «mirando para lo espuesto enriba, teniendo en cuenta que l’actu yera pa homenaxar a los poetes que pasaren pola Cátedra (y non al filólogu que-y da’l nome), tenemos la seguridá de que nunca se lleó nengún poema n’asturianu ensin permisu nin con ánimu d’ofender y a sabiendes de que la Cátedra crear cola voluntá y el dineru puestu per parte de la Universidá pública d’Uviéu y el Conceyu del mesmu conceyu; Iniciativa pol Asturianu quier manifestar el so compromisu para cola dignidá del asturianu y el so sofitu a los poetes de quien falamos anteeriormente, col encamientu tamién a tolos asturianos y non asturianos por que faigan valir los sos derechos a falar n’asturianu».
«Nun podemos dexar d’amosar el nuesu descontentu con estes declaraciones, que consideramos una falta de respetu bien grave para colos asturianos polo xeneral, los asturianoparlantes en particular y de manera especial para colos políticos y filólogos que nun tienen mieu de falar n’órganos públicos, nos medios de comunicación o na universidá o de la mesma que lo faen cada unu na so casa. Nun nos merecen más comentarios unes palabres que son pa nós tan esgrazaes pola poca educación cola que fueron diches», concluyó la organización.
