El Gobiernu d’Asturies treslladó güei la so esperiencia nel usu de les tecnoloxíes de la información y les comunicaciones al Gobiernu de Cantabria. El director xeneral de les Tecnoloxíes de la Información y les Comunicaciones (TIC), Ángel Cabal, presentó a una delegación del Executivu cántabru, presidida pol so conseyeru de Presidencia y Xusticia, Rafael de la Sierra, el funcionamientu del Consorciu Asturianu de Servicios Tecnolóxicos (CAST), un preséu creáu en 2007 ya integráu por 70 conceyos, que pretende favorecer el desenvolvimientu de l’alministración electrónica nos conceyos. Na xunta tamién participaron la directora d’esta entidá pública local, Diana Rivas, y otru directores xenerales del Executivu cántabru.
Ángel Cabal destacó que l’alministración electrónica constitúi “un elementu fundamental na meyora de la eficiencia de los conceyos y, arriendes d’ello, tien de ser considerada como un preséu pa la dinamización y meyora de la economía local y la calidá de vida nos conceyos asturianos”.
Unu de los oxetivos del consorciu ye sofitar a los conceyos con menos de 20.000 habitantes nel so desenvolvimientu tecnolóxicu y modernización, según na implantación de les midíes necesaries pa la so adaptación a l’alministración electrónica.
El conseyeru cántabru va axuntase esta tarde (17,15 hores) col conseyeru de Presidencia y Participación Ciudadana y vocera del Gobiernu d’Asturies, Guillermo Martínez, na see de Presidencia.
