La Xunta de Voceres aprobó esti llunes, a propuesta d’IX, la creación d’una Comisión especial pa la normalización, protección y promoción de la llingua asturiana. La comisión foi sofitada por PSOE, Podemos y Foru amás del grupu proponente d’IX.
Según esplicó la diputada d’IX, Concha Masa, en declaraciones a los medios, esta comisión sería complementaria al nuevu organigrama de la conseyería al traviés del cual pretende impulsase la llingua asturiana.
«Sería complementaria y yá que la cooficialidá nun paez que tea nel programa d’esta Llexislatura como sería’l deséu d’IX, a lo menos qu’en toles facetes posibles trabayar sobre la protección y promoción de -y llingua asturiana», dixo Masa.
Dende Podemos diose’l sofitu a esta comisión, anque según destacó la so diputada, Lucía Montejo, «ye insuficiente y respuende a un pactu de PSOE ya IX de llavadura de cara».
Asina Podemos pidió «dir más allá nesti asuntu» y propunxo desenvolver la Llei aprobada y abrir un procesu de reforma del estatutu que dexe garantizar los derechos en materia llingüístico n’Asturies pa toles persones».
OPOSICIÓN DE PP Y C’s
Tanto’l Grupu parlamentariu del PP como’l de Ciudadanos votaron en contra de crear dicha comisión. Dende’l PP, el voceru Agustín Cuervas Mons destacó que nun ye qu’el so grupu nun considere importante esti asuntu, sinón que «envalora que nun ye una prioridá nesti momentu nes esmoliciones de los asturianos».
Amás dende’l PP consideren qu’hai otros mecanismos como’l desenvolvimientu de la llei qu’esiste al respective en llugar de cargar el parlamentu de comisiones especiales.
Similar foi l’argumentu del voceru de Ciudadanos, Nicanor garcía, qu’indicó qu’el so grupu votó en contra de la constitución de la comisión al considerar qu’esi asuntu «nun ye nenguna prioridá».
«Tamos a favor de les midíes que favorezan l’usu y la promoción del bable y el patrimoniu cultural asturianu pero paeznos que poner la comisión específica ye da-y rangu de primer nivel a una cuestión que para nós nestos momentos nun ye prioritaria», dixo García.
