Los ganaderos asturianos manifestáronse esti vienres frente a la see del edifico de Presidencia n’Uviéu pa pidir al Gobiernu del Principáu que «escuche al sector». El miembru de la xunta de Aseava (Asociación Española de criadores de ganáu vacuno selectu de la raza Asturiana de los Valles), Atentu Fernández, esplicó a los medios que los ganaderos piden que se cumpla’l Plan del Llobu. «Gástase dineru en faer planes y depués nun se cumplen», aseguró.
Fernández tamién señaló que «les decisiones non pueden tomase detrás d’una mesa». La perda del 45% de la superficie pastable debida a l’aplicación d’un nuevu Coeficiente de Admisibilidad de Llendo foi otra de les quexes qu’espresó ante los medios.
Amás, el miembru de la Xunta de Aseava aseguró que’l sector ta «fartu» de «palabrería» sobre los Planes de roces y quemes controlaes cuando lo que se precisa ye «un Plan al llargu plazu» que se lleve a efectu «en tolos conceyos».
La candidata de Foru a la Presidencia d’Asturies, Cristina Coto, acompañó a los ganaderos na manifestación. Coto afirmó que’l campu asturiano sufre «una crisis ensin precedentes» y que nesta llexislatura’l Gobiernu de Javier Fernández «practicó la inquina col campu». Nesi sentíu, criticó al Gobiernu del Principáu qu’esbardiara » oportunidaes históriques», como les negociaciones pa la reforma de la Política Agrícola Común (PAC) o’l Plan de Desenvolvimientu Rural (PDR), pa la corrección» de la discriminación histórica» de los ganaderos n’Asturies.
A lo último, el candidatu d’IX a la Presidencia del Principáu, Gaspar Llamazares señaló les incertidumes» a les que s’enfrenta’l campu asturiano, como nel sector lácteo o cárnico. Llamazares consideró que nun fueron «abondos» nin les midíes adoptaes pol Gobiernu central nin los pactos interprofesionales. Por que haya «futuru» nel sector agrariu, aseguró que ye necesariu la «comercialización y distribución» de los productos del campu «so la marca Asturies».
