El conseyeru d’Economía y Empléu, Graciano Torre, presidió güei en Xixón la firma del plan añal d’actuación pa la promoción y sofitu a la comercialización turística de la Vía de la Plata 2015, que se va centrar n’impulsar esti itinerariu como ruta cicloturística.
El programa d’acciones da continuidá a les iniciatives desenvueltes arriendes de la firma del protocolu de cooperación en 2012 pa promocionar esta vía histórica, que va dende Sevilla a Xixón travesando cuatro comunidad autónomes y 23 conceyos, ocho d’ellos asturianos: Xixón, Llanera, La Ribera, Morcín, Riosa, Mieres, Ayer y L.lena.
El proyectu p’anguaño va reforzar les iniciatives venceyaes col mundu del motociclismu. Asina, va actualizase una guía pa realizar la ruta en bici, va publicase material informativo en dellos idiomes, van señalizase recursos y va promocionase el percorríu en distintos eventos deportivos como los premios de moto d’Aragón y la concentración internacional de Harley-Davidson que va tener llugar na localidá gaditana del Puertu de Santa María.
Tamién se van impulsar acciones de promoción conxunta en mercaos internacionales y ta previstu entamar viaxes de prensa con dellos países como Inglaterra, Francia y Canadá. Coles mesmes, va consolidase la presencia de la ruta n’eventos venceyaos cola hestoria y l’arqueoloxía, como’l festival romanu de Badalona.
El plan d’actuación pa 2015 cuenta con un presupuestu de 162.500 euros, de los que les entidaes locales integraes na Rede de Cooperación de Ciudaes na Ruta de la Plata apurren 75.380, mientres les comunidaes autónomes d’Asturies, Andalucía, Estremadura y Castiella y Llión contribúin colos 87.120 euros restantes.
La firma del nuevu plan axuntó en Xixón al vicepresidente de la Rede de Cooperación de Ciudaes na Ruta de la Plata, David Moreno Rego; el vicepresidente de la Fundación Sieglu pal Turismu y les Artes de Castiella y Llión, Javier Ramírez Utrilla; y el conseyeru delegáu de la Empresa Pública pa la Xestión del Turismu y del Deporte de la Xunta d’Andalucía, José Francisco Pérez Moreno.
Mientres l’actu, Torre destacó que la firma añal d’esti conveniu constitúi l’exemplu de cómo un bon productu concita l’interés de toos, “de manera que cuatro comunidad autónomes y 23 conceyos suman esfuerzos y recursos pa promocionar esti itinerariu”.
Aumentu de visitantes estranxeros
El conseyeru tamién se refirió a los datos turísticos publicaos pol INE el pasáu vienres, que confirmen l’enclín de los dos años anteriores con medríes, en xineru, del 12,4% en turistes y del 10,1% en pernoctaciones en relación col mesmu mes del pasáu añu. Nesti sentíu, Torre valoró la “estraordinaria” crecedera del mercáu internacional, con porcentaxes del 40,8% en turistes y del 30,3% en pernoctaciones. Al so xuiciu, esti aumentu ta rellacionáu colos programes de collaboración ente comunidaes, como’l robláu güei, y coles campañes de promoción internacional qu’Asturies encetó en solitariu l’añu pasáu.
