La conseyera de Agroganadería y Recursos Autóctonos, María Jesús Álvarez, cifró en 58.200 euros el costu del abalizamientu del accesu al puertu de Bustiu, nel conceyu de Ribedeva. Álvarez visitó güei les instalaciones de la ría de Tinamayor pa comprobar les actuaciones realizaes que, afirmó, “faciliten l’accesu de les embarcaciones con seguridá al estuariu”.
L’abalizamientu, nun percorríu d’unos 750 metros d’accesu al puertu, ye un sistema de saléu pa entrar na ría que dexa la localización de la canal d’accesu a la mesma y sigue con un conxuntu de referencies por que los barcos saleen con seguridá dende la bocana hasta la mesma entrada al puertu.
Les obres consistieron na instalación de llinternes sobre postes elevaos, de cuenta que tengan siempres un resguardu mínimu del orde de los dos metros sobre la cota de la máxima pleamar. El sistema ta compuestu por una lluz de sectores qu’empobina les embarcaciones escontra la canal d’accesu y cinco señales más dispuestes na marxe asturiana de la ría, n’allugamientos estratégicamente escoyíos que coinciden con peñes y llugares orográficos relevantes.
Con esta obra, la Conseyería de Agroganadería y Recursos Autóctonos da respuesta a una reivindicación bien demandada tantu polos pescadores como pol Conceyu de Ribedeva. Prevese qu’esti abalizamientu d’accesu al puertu facilite’l saléu pol estuariu y aumente la presencia de barcos nel usu de les instalaciones portuaries, especialmente aquelles embarcaciones pesqueres que lleven les sos captures a puyar a la rula de Bustiu.
