El diputáu d’IX d’Asturies, Gaspar Llamazares, esixe al Gobiernu una esplicación sobre’l grave retrasu na firma de los convenios de los nuevos fondos mineros n’Asturies. Llamazares demanda información al traviés de delles entrugues escrites sobre los motivos polos que l’executivu central ta retrasando la firma de los convenios del nuevu Plan del Carbón que s’aprobó va un añu. De la mesma manera, demanda respuesta a cuál ye’l calendariu previstu pol Gobiernu pa la firma d’estos convenios, tan importantes pal desenvolvimientu de les contornes mineres, la creación d’empléu y les previsiones de los conceyos. A lo último, quier saber si’l Gobiernu va integrar a una representación de l’Asociación de les Contornes Mineres (ACOM-España) na Comisión de siguimientu del Plan del Carbón, tal que soliciten los alcaldes de los conceyos pertenecientes a la mesma. “La asignación d’estes subvenciones ye fundamental nun momentu en que los conceyos de les contornes mineres tán a puntu d’aprobar los sos respectivos presupuestos d’inversión y desenvolvimientu municipal”
Llamazares faise ecu de la xunta celebrada’l 3 de xineru d’anguaño na que los alcaldes asturianos integraos en ACOM manifestaron el so descontentu col Ministeriu d’Industria polos incumplimientu del nuevu Plan del Carbón col desenvolvimientu alternativu de les contornes mineres. Tamién de la so intención de ser partes de les xuntes de siguimientu del plan, a les que namá asisten los sindicatos y la patronal minera. A estes altures, alvierte Llamazares, nun se robló nin un solu conveniu de les ayudes enmarcaes dientro del plan mineru que se robló va un añu, que sumaría alredor de 250 millones d’euros pa tol plan, col agregu de qu’estes llínees de subvenciones yá fueron publicaes nel BOE, onde se dixebraben proyectos d’infraestructures y actuaciones de restauración.
