El Gobiernu del Principáu d’Asturies aprobó una subvención de 30.000 euros a l’asociación Médicos del Mundu en respuesta a la emerxencia del ébola en Sierra Lleona. El dineru va destinar a l’alquisición d’un vehículu touterrén que dexe l’accesu a les zones más aisllaes y tratar a la población afectada.
Con esta ayuda, l’Executivu autonómicu quier contribuyir a “atender y prevenir esta enfermedá letal n’África”, como destacó la directora de l’Axencia Asturiana de Cooperación al Desenvolvimientu, Gimena Llamedo. Sierra Lleona ye unu de los cuatro países africanos onde se detectaron más casos de ébola. En xunu, el Gobiernu d’esi país declaró l’estáu d’emerxencia. El númberu de casos confirmaos n’avientu foi de 6.201 infectaos, de los que 1.626 finaron.
L’asociación Médicos del Mundu trabaya dende va ocho años nel distritu de Koinadugu nel fortalecimientu de los sistemes públicos de salú, tantu sexual como comuñal; la meyora de les infraestructures sanitaries; l’accesu a l’agua potable y la preparación na atención d’epidemies como’l cólera y el ébola.
L’oxetivu del Gobiernu asturianu ye llevar esta acción humanitaria a Koinadugu, unu de los distritos más estensos, aisllaos y más probes del país, onde la ONG dispon de dos médicos p’atender a más de 327.000 habitantes. En dómines d’agües, los caminos fáense peligrosos y n’ocasiones intransitables. La tasa d’analfabetismu ye del 80% y tien la tasa más alta de mortalidá infantil.
Esta acción completa les decisiones d’acción humanitaria llevaes a cabu pola Axencia Asturiana de Cooperación al Desenvolvimientu mientres esti exerciciu. A esti oxetivu destinó casi un millón d’euros, un 21,71% del presupuestu total de l’axencia. Amás d’atender situaciones d’urxencia, sofitáronse proyectos destinaos a atender a poblaciones afectaes por conflictos crónicos, como ye’l casu de la población saharagüi, una de les prioridaes pal Gobiernu del Principáu.
A la campaña del Sahara destináronse 440.000 euros p’alimentos, medicines, material sanitario y atención médica n’Asturies a enfermos saharagüis.
Mientres anguaño, el Gobiernu asturianu tamién collaboró con una subvención de 70.000 euros p’atender a la población palestina refuxada na franxa de Gaza, tres los ataques esti branu del gobiernu israelín y en respuesta a la llamada del Comité Español de UNRWA.
Igualmente, sofitáronse proyectos de nutrición infantil en Mali; de protección a persones amenaciaes pola defensa de los derechos humanos en Colombia, y d’atención a ciudadanos sudaneses refuxaos nel Chad.
