La conseyera de Bienestar Social y Vivienda, Graciela Blanco, anunció güei n’Avilés qu’esti mes d’avientu va poner en marcha la tarxeta acreditativa del grau de discapacidá, una de les principales reivindicaciones de les entidaes y asociaciones que representen a les persones con dalgún tipu de discapacidá. La tarxeta va tener validez en tol territoriu nacional.
Graciela Blanco destacó que la tarxeta va facilitar cualquier trámite nel que se riquir presentar el certificáu de discapacidá, bien sía ante una entidá o institución, tantu de calter pública como privada. Del usu d’esta tarxeta beneficiaránse unes 124.000 persones, el 11,5% de la población asturiana, que tien reconocíu grau de discapacidá.
La conseyera realizó esti anunciu nel actu institucional del Día Internacional de les Persones con Discapacidá, que se celebró nel Teatru Palacio Valdés, n’Avilés, y nel que tuvo acompañada pol director xeneral de Polítiques Sociales, Enrique Rodríguez Nuño. Más de 400 usuarios de centros de sofitu a la integración (CAI) y familiares participaron nes actividaes entamaes, la mayoría protagonizaes polos mesmos usuarios.
Primeramente, el director xeneral de Polítiques Sociales visitó’l CAI de Cardeo, en Mieres, que tamién entamó actividaes pa recordar esta efemérides. Tamién en Xixón, en Llaboral Centru d’Arte y Creación Industrial, diéronse cita unes 200 persones con dalgún tipu de discapacidá n’otru actu conmemorativo.