La conseyera d’Educación, Cultura y Deporte, Ana González, presentó güei ante la Comisión de Facienda y Sector Públicu de la Xunta Xeneral del Principáu les cuentes del so departamentu pa 2015, que van xubir a 756.437.886 euros, que se van destinar a caltener l’esfuerzu financieru na área d’educación. El presupuestu d’Educación ye’l segundu mayor del Gobiernu del Principáu y representa un 19% del proyectu de 2015..
El departamentu que dirixe Ana González centró los sos esfuerzos nel caltenimientu de la equidad y la calidá del sistema educativu. Pa ello, amóntense les ayudes sociales que garanticen l’accesu a la educación en condiciones d’igualdá y auméntase la inversión n’equipamientos educativos públicos.
Por departamentos, la Viceconsejería de Cultura y Deporte ta dotada con 35.658.853 euros, que se van destinar fundamentalmente a caltener el patrimoniu cultural y a la promoción de la industria cultural asturiana. Tamién s’intentó caltener la ufierta deportiva, dando prioridá al deporte base.
El montante global presupuestáu supon un descensu de 1.172.175 euros respecto al presupuestu inicial de 2013 (postreru presupuestu aprobáu) de la Conseyería d’Educación, Cultura y Deporte, esto ye, un amenorgamientu d’un 0,15% per cientu. Si compara la cantidá sobre’l creitu prorrogáu afechu de 2014, produzse una medría d’un 0,37%.
