La conseyera de Agroganadería y Recursos Autóctonos, María Jesús Álvarez, anunció güei na Xunta Xeneral del Principáu que’l Gobiernu asturianu va presentar primero que remate l’añu una marca calidable qu’ampare’l pexe de la flota artesanal de la rexón y que se va usar, en principiu, nes rulas de Bustiu, Llanes y Ribedeva.
Álvarez consideró esta iniciativa como un apueste decidíu, con financiamientu y asesoramientu técnicu pa desenvolver un sellu calidable”, que se suma al proyectu yá en marcha de certificación internacional de la pesquería sostenible del pulpu nel occidente asturianu, “que puede abrir nuevos mercaos nel centru d’Europa y supondría la primer certificación MSC d’un cefalópodu a nivel mundial”, n’alusión a la organización MSC, que promueve la pesca sostenible y respetuoso.
La conseyera esplicó na Cámara que’l desembarco de pexe nos puertos asturianos creció hasta’l pasáu 31 d’ochobre en más de cuatro millones de quilos, lo que supon una facturación de 4,3 millones d’euros. Destacó, amás, les bones resultancies llograes nuna costera fundamental pa la flota asturiana como ye la del bonitu, que supunxo que la rula d’Avilés “llograra les meyores cifres dende l’añu 2006, al consiguir puyar 1.200 tonelaes frente a les 846 tonelaes del añu pasáu”.
María Jesús Álvarez tamién se refirió a la meyor xestión de los recursos cola execución del Plan Esperimental pa la Xestión de la Pesca de l’Angula na Ría de Tinamayor, en collaboración con Cantabria, que dexó entamar un colectivu de 20 anguleros y amontar les vientes de Bustiu, y poner en marcha la campaña esperimental de la perceba de branu en Puertu de Vega, Viavélez y Ortiguera.
Na so opinión, el mayor problema al que s’enfrenten el pescadores asturianos ye la escasez de cuotes nuna especie como la xarda y recordó la repartida perxudicial pal Principáu que llevó a cabu’l Ministeriu d’Agricultura, contra’l que’l Gobiernu asturianu presentó un recursu contenciosu, yá almitíu a trámite pola Audiencia Nacional.
Tocantes a les infraestructures pesqueres, María Jesús Álvarez recordó que se ta executando la rula de Lluanco, que la so obra va rematar el próximu añu, tres una inversión de 1,2 millones d’euros, y la concesión d’una ayuda de 870.000 euros pa la nueva fábrica de xelu d’Avilés, “que va beneficiar a gran parte de la flota pesquera asturiana”.
