La conseyera de Agroganadería y Recursos Autóctonos, María Jesús Álvarez, presentó güei na Feria del Campu y de les Industries Agrícoles, Ganaderes, Forestales y Pesqueres (Agropec) la bolsa d’arrendamientos rústicos que punxo en marcha’l so departamentu al traviés del Bancu de Tierres. Esta iniciativa va dexar poner en contactu a propietarios de tierres con renteros, va garantizar estabilidá nos contratos y va favorecer que les finques queden en bones condiciones agraries y medioambientales cuando rematen los arrendamientos.
D’esta miente, la conseyería pretende ameyorar la xestión de terrenales infrautilizados y dotar de garantíes a los propietarios. Nesti sentíu, Álvarez esplicó que l’usu de la bolsa d’arrendamientos rústicos “nun va implicar gastos nin pal propietariu nin pal arrendador, porque va ser l’alministración del Principáu la que va exercer el serviciu d’intermediación al traviés del Bancu de Tierres”. Amás, podrá aportase a esti recursu tantu de forma presencial como telemática, per mediu de la páxina www.asturias.es, pa consultar qué finques tán na bolsa y en qué condiciones.
La titular de Agroganadería señaló que ye precisu movilizar suelu pa les esplotaciones ganaderes que precisen base territorial pa menguar los sos gastos en compra de piensos y forraxes, ampliar superficie pa nueves instalaciones o “dar una orientación más agrícola del sector primariu asturianu”.
María Jesús Álvarez indicó que, partiendo de la realidá de qu’esisten tierres que tán infrautilizadas o abandonaes, el Principáu pon en marcha esta nueva ferramienta que dexa una xestión gratuita del procesu d’arrendamientu y depósitos de contratos y ufierta un serviciu d’información y asesoramientu técnicu y xurídicu, de la que fomenta l’arbitraxe como mediu de resolvimientu de conflictos.
Les finques qu’integren la bolsa d’arrendamientu pueden ser tantu de propiedá pública (del Estáu, al traviés de convenios de collaboración, del Principáu o de los conceyos), como finques rústiques quitaes polo xeneral, escluyíes les forestales y esplotaciones agraries, amás de les procedentes del cese antemanáu na actividá agraria.
Per otru llau, la conseyera refirióse al programa de permutes de finques rústiques que desenvuelve’l Bancu de Tierres, que tamién pretende movilizar terrenes y reestructurar les esplotaciones agraries afectaes pol minifundismo. Asina, esplicó que’l programa de permutes de finques rústiques consiste en fomentar l’intercambiu de parceles ente los propietarios coles mires d’esaniciar les denominaes enclavaes (que tán metanes otra propiedá), suprimir servidumes de camín o reestructurar esplotaciones concentrando o aumentando la superficie con colindantes.
