El Gobiernu del Principáu decidió poner en marcha un programa esperimental de formación profesional dual dirixíu a 60 moces d’ente 16 y 24 años que se va articular al traviés d’un contratu pa la formación y l’aprendizaxe. La iniciativa, que va tener por finalidá la cualificación profesional de les persones participantes al traviés del llogru de certificaos de profesionalidá y el títulu de formación profesional inicial, foi presentada esta mañana pol conseyeru d’Economía y Empléu, Graciano Torre.
Torre avanzó que’l desenvolvimientu formativu del programa va enllargar mientres tres año y va tar venceyáu a un contratu llaboral pa la formación y l’aprendizaxe d’una duración mínima d’un añu, prorrogable añalmente. Les enseñances van ser impartíes al traviés de la rede de centros integraos públicos de formación profesional del Principáu.
Los destinatarios del programa tendrán de cumplir dellos requisitos, ente ellos llevar empadronaos en cualquier conceyu asturianu siquier tres meses a fecha de la publicación de la convocatoria, ser desemplegáu mayor de 16 años y menor de 25, llende máxima d’edá que nun s’aplicará nel casu de persones con discapacidá. Amás, van tener que tener un títulu d’Enseñanza Secundaria Obligatoria o Bachilleratu, nun haber tao contratáu indefinidamente en cualquier empresa dientro de los trés meses previos a la formalización del contratu de formación y nun haber tao contratáu nos seis meses anteriores a la fecha del contratu pa la formación y l’aprendizaxe. Coles mesmes, los mozos van haber de tar inscritos de conformidá nel ficheru del Sistema Nacional de Garantía Xuvenil a fecha d’entamu del contratu.
Les empreses que participen nel programa tamién tendrán de cumplir unos requisitos, como cuntar con centros de trabayu na comunidá autónoma nos qu’empresten los sos servicios los mozos; ser empreses o entidaes ensin ánimu d’arriquecimientu y non venceyaes nin dependientes de les alministraciones o acreditar tener entamáu’l sistema de prevención. Coles mesmes, les nueves contrataciones tendrán de traer una medría neta del númberu de trabayadores na plantiya d’estes empreses en comparanza cola media de los 12 meses previos al mes del contratu. Per otra parte, tendrán de colgar la ufierta na páxina d’Internet de Trabajastur.
El salariu de el trabayadores contrataos va ser l’establecíu nel conveniu colectivu y en nengún casu va ser inferior al salariu mínimu interprofesional en proporción a la de trabayu efectivu.
L’actividá formativa va desenvolver en réxime d’alternanza cola actividá llaboral retribuida na empresa. Los mozos van permanecer tres díes a la selmana trabayando na empresa y van dedicar otros dos a l’actividá formativa nel centru de formación.
Los ciclos formativos oxetu del primer programa esperimental de Formación Profesional dual son los siguientes:
– Instalaciones eléctriques y automátiques a impartir nel Centru Integráu de Formación Profesional d’Avilés.
– Caltenimientu electromecánicu a impartir nel Centru de Caltenimientu y Servicios a la Producción de Llangréu.
– Mecanizado a impartir nel Centru Integráu de Formación Profesional de La Llaboral (Xixón).
– Soldadura y calderería a impartir nel Centru Integráu de Formación Profesional d’Avilés.
El centru formativu va designar, ente’l profesoráu qu’imparta docencia directa al grupu, un tutor responsable de la programación y siguimientu de les actividaes formatives, lo mesmo que de la coordinación de la evaluación de los módulos formativos. Esti tutor tamién va exercer d’interlocutor cola empresa pal desenvolvimientu de l’actividá formativo y llaboral establecida nel contratu.
El Serviciu Públicu d’Empléu del Principáu yá punxo a disposición de les empreses una dirección de corréu electrónicu –formaciondualasturias.org- pa recibir y contestar toles cuestiones que tean interesaes en plantegar, según pa ayudar a realizar los trámites de contratación.
