La Comisión Rectora del Parque Natural de Ponga dio güei la so aprobación inicial al Preséu de Xestión Integráu (IGI) del espaciu protexíu, nuna xunta a la qu’asistió la conseyera de Agroganadería y Recursos Autóctonos, María Jesús Álvarez.
El testu, que foi aprobáu por mayoría, incorpora gran parte de les propuestes realizaes, mientres el períodu de participación pública, por distintos colectivu como la parroquia rural de Sobrefoz, asociaciones conservacionistas, deportives, de turismu, sindicatos agrarios o particulares.
Nel documentu incluyéronse aquelles suxerencies y aportaciones unviaes a la Dirección Xeneral de Recursos Naturales que van dirixíes a ameyorar la xestión de los recursos naturales y a potenciar les actividaes tradicionales. Asina, matizáronse aspeutos qu’inciden na vida cotidiana. Por casu, dexar a tolos vecinos el tránsitu por tol territoriu, la meyora y arreglu de cortes, l’aprovechamientu de camperes, les roces agrícola y forestal de superficies menores de 10 hectárees o’l caltenimientu, caltenimientu y arreglu de les infraestructures ganaderes (mangues, bebederos, fontes, apriscos) xuntu cola llimpieza, caltenimientu y arreglu de viales.
Coles mesmes, ye llibre l’usu de tola rede de caminos, senderos y rutes del parque a cuerpu o per medios non motorizados y de toles carreteres per medios motorizados. Igualmente, nesti testu, considérase autorizable l’apertura de nueves pistes, l’ampliación de carreteres, la instalación d’invernaderos, les roces de superficies mayores de 10 hectárees y les quemes controlaes.
Tamién s’aceptó la desapaición de delles restricciones como l’ampliación de carreteres, la llimitación d’anchu nos caminos a 3,5 metros, la condición de rimaes cimeres a 10% pal hormigonado de caminos o la considerancia de nueva apertura al arreglu de caminos antiguos.
El IGI del Parque Natural de Ponga, como’l restu de los preseos de xestión integraos de los distintos espacios naturales d’Asturies, tien como oxetivu prioritariu llograr l’equilibriu ente’l caltenimientu de los valores naturales y el desenvolvimientu endóxenu. Pa ello promueve l’actividá económica na zona, especialmente, la que ta amestada al sector primariu como ye la ganadería, el sector forestal y l’industria agroalimentaria. Tou ello, teniendo en cuenta tamién el fomentu del turismu y l’usu públicu del territoriu.
El Preséu de Xestión Integráu (IGI) del Parque Natural de Ponga aprobáu primeramente güei va pasar agora a sometese a información pública mientres un mes y, de siguío, al trámite d’audiencia pública a los afectaos. Una vegada incorporaes los allegamientos y suxerencies recibíes, el nuevu testu va presentase otra vegada ante la Comisión Rectora y ante la Xunta del Parque, antes de ser ratificáu pol Conseyu de Gobiernu del Principáu.
Tou este proceso de tramitación tien de tar rematáu antes del 31 d’avientu de 2014, en cumplimientu del plazu señaláu pola Comisión Europea al Estáu español pa cuntar con preseos de xestión de los espacios protexíos y de los espacios integraos na Rede Natura.
Cuando’l IGI tea definitivamente aprobáu va sustituyir al actual Plan Rector d’Usu y Xestión (PRUG) y va ser el marcu de referencia pa la xestión del Parque Natural de Ponga.
