El director xeneral de Comerciu y Turismu del Principáu, Julio González Zapico, participó esta mañana en Madrid na firma del conveniu que desenvuelve’l Plan Añal d’Actuación pa la Promoción y Sofitu a la Comercialización Turística de la Ruta Vía de la Plata 2014.
El plan robláu da continuidá a les iniciatives que se lleven a cabu dende 1997 pa promocionar esti destín turísticu y que dexaron impulsar distintes acciones tantu en territoriu español como nel esterior. P’anguaño, el programa inclúi financiamientu pa la edición de publicaciones turístiques, la presencia n’eventos feriales ya iniciatives con turoperadores. Tamién va dexar avanzar n’aspeutos como la señalización de recursos turísticos en carreteres.
El director xeneral de Comerciu y Turismu demandó mientres l’alcuentru un mayor impulsu per parte del Gobiernu central a iniciatives como ésta, na que suman esfuerzos distintos territorios españoles con muncho potencial por esplotar.
Coles mesmes, propunxo qu’Asturies acueya’l próximu añu la firma del alcuerdu, como exemplu d’un modelu de conocencia mutua, nel que se pongan en valor la diversidá y riqueza natural y cultural de los territorios representaos”.
La Ruta Vía de la Plata ye un itinerariu históricu qu’escurre dende Sevilla a Xixón, travesando cuatro comunidad autónomes y distintos conceyos, dalgunu de los cualos arrexuntar nuna rede de cooperación. De los 24 conceyos que conformen l’itinerariu, ocho son asturianos: Xixón, Llanera, La Ribera, Morcín, Riosa, Mieres, Ayer y L.lena.
