El Conseyu de Gobiernu aprobó un conveniu ente la conseyería de Sanidá y el ministeriu d’Industria, Enerxía y Turismu. Conforme a esti alcuerdu, el ministeriu va apurrir 150.000 euros al Institutu Nacional de Silicosis (INS) pa financiar en 2014 les actividaes d’interés común que precisen de la especialización del institutu como centru d’investigación na prevención de la silicosis y otres neumoconiosis (enfermedaes pulmonares producíes pola inhalación de polvu), según en temes de seguridá ya hixene industrial rellacionaos col ruiu, les vibraciones y los gases. Dambes instituciones establecieron dende l’añu 2000 convenios que se materializaron n’importantes llogros y meyores pa la salú llaboral.
Por aciu esti conveniu’l Serviciu de Salú del Principáu (SESPA) comprométese, al traviés del INS, a executar llínees d’actuación comunes, ente les que destaca la definición y ellaboración de programes pa la detección, reconocencia y caracterización del riesgu en relación cola seguridá y salú de el trabayadores; la definición de los estudios y trabayos específicos derivaos de dichos programes; actuaciones relatives al control y prevención del polvu, ruiu y vibraciones nes mineríes soterrañes y a cielu abiertu. L’institutu collabora amás na capacitación y formación técnica de profesionales. Tamién se van establecer llínees particulares d’investigación.
El programa pa 2014 inclúi 25.000 euros pa la revisión de la implantación y efectividá de la prevención n’empreses con altu riesgu por esposición a xil; 15.000 euros pa la caracterización de materies primes con eleváu conteníu en xil col fin d’ameyorar l’aplicación del protocolu de la silicosis; 40.000 euros p’afondar na fiabilidá de les bombes d’altu caudal pal muestreo de xil cristalín respirable. Igualmente, van destinase 40.000 euros pa la evaluación del riesgu por esposición a fumos d’escape diesel, 20.000 pa estudiar los riesgos de la esposición a la radiación solar na actividá extractiva a cielu abiertu y 10.000 p’actividaes empuestes a establecer un Plan Nacional del Control de la Silicosis.
