L’Executivu va destinar 955.000 euros pa cubrir les necesidaes de contratación de personal temporal docente pal cursu escolar 2013-2014. Ye una autorización de gastu p’acabar el cursu, porque la partida primeramente prevista nun yera abonda.
Per otra parte, la conseyería fixo pública na páxina web www.educastur.es el calendariu previstu pa l’axudicación de places de profesoráu interín pal próximu cursu. El 16 de xunetu, Educación va publicar los llistaos de los aspirantes de toos aquellos cuerpos y especialidaes que nun sían oxetu del actual procedimientu selectivu (esto ye, la llista de tolos convocaos, sacante d’aquelles especialidaes que participaron nes oposiciones).
No que fai a los aspirantes a interinidá del cuerpu de maestros, l’alministración educativa va publicar les places ufiertaes el 22 d’agostu y va abrir un plazu pa realizar pidimientos hasta’l 27 d’agostu. L’axudicación va faese efectiva’l 29 d’agostu y van haber d’incorporase al centru educativu que-yos correspuenda’l 1 de setiembre. Les actividaes lectives n’infantil y primaria empiecen el 11 de setiembre.
Tocantes a la llista de convocaos de los aspirantes a interinidá de los demás cuerpos docentes (secundaria y formación profesional) d’aquelles especialidaes afectaes pol procesu d’oposiciones va faese pública’l 22 d’agostu. La conseyería va disponer un plazu d’allegamientos hasta’l 28 d’agostu. Mientres esti tiempu, los aspirantes van poder presentar les calificaciones llograes n’otros procedimientos selectivos, acordies con lo previsto nel alcuerdu suscritu ente’l Gobiernu y les organizaciones sindicales FSES y UXT na mesa sectorial de negociación de personal docente.
Les llistes definitives d’interinos de les especialidaes afectaes poles oposiciones van publicase’l 2 de setiembre. Nesa mesma fecha van faese públiques les places ufiertaes por Educación y va abrise un plazu de pidimientos hasta’l 9 de setiembre. L’axudicación publicará’l 10 de setiembre y la previsión d’incorporación al centru ye’l 12 de setiembre. L’entamu de les actividaes lectives nos centros de secundaria, bachilleratu y formación profesional ye’l 17 de setiembre.
