(EUROPA PRESS) El presidente del Principáu, Javier Fernández, reconoció esti llunes en Mieres qu’hai «errores» na puesta en marcha de los nuevos hospitales d’Asturies: tanto nel Hospital Central d’Uviéu como nel Álvarez-Buylla. De siguío, el máximu dirixente rexonal dexó claro que «los fallos d’última hora son correxibles».
«Lo que nun tendría remediu sería dexar a Mieres, a Ayer, a L.lena, a toa Asturies sin estos dos grandes centros de referencia», siguió’l Presidente, mientres un discursu ofrecíu por cuenta de l’abertura del Ciclu de Conferencies Nueves Tecnoloxíes nos hospitales modernos’. Asina, Javier Fernández tamién fizo referencia a l’alta inversión que supunxeron les actuaciones, «superior a los 430 millones d’euros».
Nesti puntu, señaló que la construcción de los nuevos equipamientos «basóse en decisiones polítiques». Unes decisiones que Fernández asume «dafechu». «¿Merecía la pena dedicar una inversión cuantiosa -elevóse a 57 millones- a edificar un nuevu hospital xeográficamente próximu a Uviéu? Nun sé si unos años más tarde, cola crisis tracamundiándolo too, pudiera entamase. Lo que-yos aseguro ye qu’ésa foi una decisión qu’asumo dafechu», destacó.
L’actu d’abertura del ciclu de conferencies contó cola presencia de la presidenta d’Hunosa, María Teresa Mallada. La hullera pública apoyó’l proyectu de xeotermia col que da suministru al Álvarez Buylla. «Ye un proyectu innovador, n’Europa hai bien pocos proyectos asemeyaos. N’España ye’l segundu proyectu de mayor envergadura con estes característiques», señalaron técnicos de la hullera pública.
