(EUROPA PRESS) El presidente del Gobiernu, Mariano Rajoy, aseguró esti miércoles que la reforma fiscal que diseñó l’Executivu ye una «magnífica reforma», que va baxar impuestos a los contribuyentes y va valir pa promover el crecimientu económicu y l’empléu, un argumentu que nun convenció al secretariu xeneral del PSOE, Alfredo Pérez Rubalcaba, que-y alvirtió qu’esta reforma acabará per tornar en más recortes sociales.
Mientres la sesión de control al Gobiernu nel Plenu del Congresu, Rajoy defendió la so reforma fiscal, insistiendo en que va implicar una rebaxa media nel IRPF del 12,5%, «llegando hasta al 30% en dellos casos, fundamentalmente nes rentes medies y baxes».
El líder de la oposición, pela so parte, recordó al presidente que l’IRPF ye ún de los 50 impuestos que subió’l Gobiernu nesta llexislatura, y avisólu que la reforma plantegada va enzancar el cumplimientu de los oxetivos de déficit. «Habrá problemes col déficit y volverán apretar a les comunidaes autónomes pa qu’haya recortes sociales», denunció.
Rubalcaba sorrayó que’l problema d’España ye d’ingresos y qu’éstos tienen qu’aumentar pa qu’haya más polítiques sociales. Por ello, insistió en que’l so partíu va presentar una alternativa a la reforma fiscal del Gobiernu, que va incluyir un impuestu pa gravar la riqueza y que va buscar el fraude con mayores medios pa la Inspección.
«Vamos facer una propuesta alternativa a la suya pa que los ingresos n’España lleguen a la media europea, de forma que podamos tener gastu social: más educación pública, más sanidá pública y pensiones. Vamos facer una propuesta alternativa pa que paguen los que nunca pagaron, los defraudadores, pa que paguen más les grandes fortunes y pa que paguen menos los que pagaron siempre, los trabayadores y les clases medies», aseguró.
Rajoy, pel so llau, reprochó-y a Rubalcaba que critique al Gobiernu tanto si baxen como si suben los impuestos y indicó que yá podría presentar una reforma fiscal cuando taba nel Gobiernu, porque entós la recaudación taba cayendo en 70.000 millones d’euros.
Frente a les crítiques del líder de la oposición, el presidente tamién defendió’l calter social de la so reforma. «¿Qué ye más social que’l fechu de que los que ganen menos de 12.000 euros nun tributen, o qu’aquéllos que ganen menos de 18.000 euros al añu vean reducida la so tributación nun 31%, o que los que ganen menos de 24.000 euros al añu véanla rebaxada nun 23%?», presentó-y Rajoy a Rubalcaba.
Afondando nesta cuestión, el presidente destacó que se caltienen les ayudes a les madres, establécense ayudes pa families numberoses, pa les que tienen persones con discapacidá, al tiempu que s’aumenten los mínimos exentos, rebáxase l’impuestu d’entamadores «y faise la primer vez una reforma de la llei tributaria pa lluchar contra’l fraude».
«Ye una magnífica reforma que baxa los impuestos al contribuyente. Nun pudo facese hai dos años, pero agora sí, y va valir pa qu’haya más crecimientu económicu y más empléu», acabó.
