Veinte mujer del mediu rural asisten a un cursu de formación nel Centru d’Empreses de Valdés col fin d’emprestar nun futuru’l serviciu de sustitución nes esplotaciones agraries y cubrir les xeres del campu tradicionalmente amestaes a les muyeres. Les participantes nel cursu, que se va enllargar hasta’l día 29, son de los conceyos de Valdés, Tinéu, Navia y Coaña.
Con esta esperiencia piloto faise efectiva la primer actividá pal desenvolvimientu del programa Más qu’un respiru, puestu en marcha pol Gobiernu del Principáu en xunetu al traviés de les conseyeríes de Presidencia y Agroganadería, coles mires de favorecer el desenvolvimientu personal, profesional y social de les muyeres del mediu rural.
La formación va centrar na atención y curiáu de persones dependientes; xeres doméstiques y del llar; güerta y curiáu d’animales n’esplotación ganadera; prevención de riesgos llaborales y primeros auxilios. Al terminar la formación les 20 muyeres, escoyíes por aciu criterios de proximidá, movilidá y pertenencia al mediu rural, van pasar a formar d’una bolsa d’empléu xestionada pola Cooperativa Campoastur, integrada por paraes y autónomes del réxime agrariu qu’aspiren a diversificar la so actividá y los sos ingresos económicos.
Esti plan Más qu’un respiru, amás d’ampliar el serviciu de sustitución qu’ufierten les cooperatives pa sofitar el llabor nes esplotaciones (por casu, en períodos de vacaciones, baxes llaborales o temporaes d’intensa actividá), tien la finalidá de sustituyir y cubrir toes los llabores que tradicionalmente realicen les ganaderes, lliberar de les sos llargues xornaes llaborales por que puedan asistir a cursos de formación, xornaes de participación y actividaes asociatives o d’ociu.
L’oxetivu ye que les ganaderes puedan participar nel desenvolvimientu cooperativu nes mesmes condiciones que los homes.
Na presentación del programa Más qu’un respiru, el conseyeru de Presidencia sorrayó la importancia del mediu rural como “escenariu imprescindible pa xenerar esperiencies que dexen amontar les tases d’empléu de les muyeres, encetar l’avieyamientu activu como una oportunidá de meyora de la calidá de vida de los mayores y promover servicios de conciliación”.
