Esti 14 de febreru cumpliranse 128 años de la conocida como «la gran nevadona» o «la nevadona de los trés ochos» que caltuvo incomunicada’l Pandu con Asturies y Cantabria mientres un total de doce díes una y bones les precipitaciones en forma de nieve algamaron los cuatro metros na localidá lleonesa de Villamanín –tamién afectó a la estación de Busdongo– y taparon les boques de los túneles del ferrocarril.
La efeméride meteorolóxica coincide nel tiempu cola previsión de l’Axencia Estatal de Meteoroloxía (AEMET), qu’espera qu’a partir del domingu pela tarde empiece a nevar, siquier hasta’l martes, percima de 500 a 800 metros d’altor y que van baxar les temperatures.
Esto va provocar, según esplicó a Europa Press la vocera de la AEMET, Ana Casals, qu’ente’l domingu pela tarde y el martes podrá atropase hasta mediu metro de nieve nes zones de monte del pandu, tantu nel norte como nel sistema Central ya Ibéricu. Tamién se preven xelaes xeneralizaes nel interior que nes zones montascoses van poder dexar valores d’hasta -10 graos centígrados.
Ante les consecuencies de la gran nevada de la que se tien alcordanza en Cantabria y Asturies –nevó de forma siguida hasta’l día 20, episodiu al que siguió otra gran nevada que s’enllargó hasta’l 20 de marzu sumáu a fuertes xelaes–, la compañía ferroviaria movilizó tolos recursos humanos –250 obreros– anque los sos esfuerzos nun tuvieron resultáu polos continuos ádenes que se producíen, a lo que se sumaben los efectos de les fortísimas ventisques que faíen invidable los trabayos de espaleo nes víes.
Según cuenta la hestoria, yera tan fuertes les ventisques que’l vientu introducíen la nieve nel interior de los túneles hasta 70 metros lo que derivó en casos de túneles enfarxopetaos de nieve al llegar per dambes boques. Amás, máquines y vagones sumieron so la nieve que cayía «a puñaos».
Ante la falta resultaos nos trabayos de los emplegaos de Renfe finalmente incorporáronse a los llabores de llimpieza de los túneles y de les víes 900 soldaos lo que dexó que’l día 26 de febreru cruciara Payares el primer convói qu’había estáu deteníu na estación de Llión dende principios de la gran nevada.
Según consta en dellos documentos, un grupu d’homes qu’intentaba pasar de Llión a Asturies siguiendo la vía ferrial tuvo que abasnar pa poder salir de los túneles del ferrocarril por cuenta del altor de la nieve. En dellos puntos de la ruta na zona de Payares llegaron a abrir un riegu sobre los teyaos de los edificios.
