Connect with us

Noticies

Sidoro Villa gana’l premiu Xosefa Xovellanos de Novela en llingua asturiana

Publicado

el

La obra El fervinchu, del escritor Sidoro Villa (Lieres, 1962) foi la ganadora de la cuarentena primer edición del premiu Xosefa Xovellanos de Novela en llingua asturiana. El gallardón, convocáu y concedíu pola Conseyería de Cultura, Política Llingüística y Turismu del Gobiernu d’ Asturies, tien una dotación de 5.000 euros.

El xuráu encargáu de valorar les obres, reuníu baxo la presidencia del director xeneral de Política Llingüística, Antón García Fernández, tuvo formáu pola promotora cultural Natalia González, el profesor Marcos Martínez, les escritores Marta Mori y Paula Pulgar, y el ganador de la edición anterior, Francisco Álvarez González. Actuó como secretaria Lourdes Álvarez, filóloga de la Dirección Xeneral de Política Llingüística.

El xuráu quixo valorar bien positivamente’l númberu d’obres presentaes, doce, y sobremanera el “nivel escelente” de munches d’elles. L’acta esplica que la trama d’ El fervinchu “xira alredor de los llazos familiares y la so perduración nel tiempu, antes y depués de la muerte, nun contestu rural que termina’l so ciclu”. La obra, que puede considerase una novela coral, ta estructurada alredor de la güela, un papel protagonista concebíu como personaxe femenín d’una gran fortaleza y complexidá. El xuráu tamién destaca “la construcción del restu de personaxes, la so fondura psicolóxica y l’humor negru que percuerre tola obra”.

Sidoro Villa Costales ye profesor de primaria en el lCP Xentiquina de Lieres, ilustrador y escritor. Tien publicaos llibros de lliteratura infantil y xuvenil como Llibru de los suaños (2007), ¡Nun-yos tengas perceguera! (2004), Mael al debalu (2010), Evaristo Valle, el pintor del antroxu (2011), Nun-yos tengas perceguera 2 (2016). También publicó les novelas A estaya (2016) y Tres beyuscos (2019).

Advertisement

LO MÁS VISTO !!