(EUROPA PRESS) El presidente del Gobiernu,Mariano Rajoy, sorrayó que la llei d’Abdicación qu’esti miércoles aprobóse nel Congresu nun revisa’l modelu políticu del Estáu previstu na Constitución, sinón que se llenda a roblar la voluntá del rei de dexar la Xefatura del Estáu y pidió a los grupos parlamentarios qu’aparquen por ello otres cuestiones que, pal so discutiniu, tienen «ocasiones sobraes» el restu del añu.
«Lo qu’espera la nación de nós ye qu’atendamos el deber de güei con sen de la oportunidá, altor de mires y responsabilidá», dixo Rajoy na so intervención ante’l Plenu del Congresu pa defender el proyectu de llei orgánica.
El presidente del Gobiernu aseguró que la de güei ye una xornada histórica na que los parlamentarios tienen de cumplir lo que manda la Constitución. «Xornada na que pesen munchos de los nuesos acuerdos y nun tienen trescendencia les discrepancies», dixo. «Nun tamos equí güei pa eso, sinón pa cumplir la voluntá de los españoles, qu’eso y non otra cosa ye la Constitución», añadió.
Rajoy almitió que l’aprobación de la llei d’Abdicación nun ta «reñida coles crítiques», que la Constitución contempla los mecanismos pa la reforma, pero quiso insistir que güei nun ye’l día nin el trámite pa estos alderiques. «Disponemos d’ocasiones sobraes a lo llargo del añu pa sorrayar les nueses diferencies», calcó.
Y aseguró amás que les encuestes indiquen que la mayoría de los españoles nun cuestionen la monarquía parlamentaria sinón que ven nella «el meyor símbolu de la unidá y permanencia del Estáu» y la «meyor opción que garantiza la imparcialidá, la estabilidá política, la continuidá de les instituciones y en definitiva la convivencia en paz que ye indispensable pal progresu y la prosperidá».
LLEALTÁ DEL PSOE
El secretariu xeneral del PSOE, Alfredo Pérez Rubalcaba, pela so parte «respetu y llealtá» del so partíu al futuru reináu de Felipe VI, pal que pidió que s’abra «un tiempu nuevu» con reformes «pactaes y consensuaes» de la Constitución que permitan resolver la triple crisis –social, institucional y territorial– que, al so xuiciu, traviesa’l país.
Asina pronuncióse Rubalcaba ante’l Plenu del Congresu mientres el debate del proyectu de llei que regula l’abdicación de Juan Carlos I, una norma que los socialistes van apoyar porque, según indicó, trátase de «cumplir la llei y la Constitución».
El cabezaleru del PSOE –aplaudíu en delles ocasiones pol so grupu y hasta por dellos diputaos del PP que tamién espresaron el apoyu al so discursu cuando baxó de la tribuna– insistió en que «nun cabe otra posibilidá que votar afirmativamente» esta llei que respuende a la voluntá llibre del rei d’abdicar», pero, amás, sorrayó que’l ‘sí’ del PSOE reafirma tamién la so «fidelidá al acuerdu constitucional».
Amás, calcó en que nesta llei decídese «sobre abdicación y namás sobre l’abdicación» y calcó que lo que se lleva al Congresu nun ye la sucesión, que ta regulada na Carta Magna.
«Nun vamos votar la sucesión del rei Juan Carlos I pol so fíu, el Príncipe d’Asturies. Eso yá lo votamos equí nesta Cámara en 1978 y reatificóla de sobra por referéndum el pueblu español cuando votamos la Constitución», calcó.
Pero amás, sorrayó que dicir ‘non’ a esti proyectu de llei significaría que l’abdicación nun ta «bien formulada» o que’l Congresu «nun autoriza l’abdicación del rei», lo que sería «un aprobiu».
Trátase, a última hora, de «cumplir cola Constitución» que los socialistes ayudaron a crear y de cumplir la llei, que «ye una obligación ineludible, insoslayable del Congresu de los Diputaos nun Estáu de Derechu».