La Conseyería d’Educación en collaboración cola de Cultura, Política Llingüística y Turismu convocó les primeres pruebes de certificación de llingua asturiana del nivel de competencia Intermediu B2 nel Principáu d’Asturies. Esta convocatoria fíxose acordies con el decretu 47/2019, de 21 de xunu, pol que s’establecen los niveles de competencia nel usu de la llingua asturiana y se regula la prueba de certificación correspondiente al Marcu Común Européu de Referencia de les Llingües.
Anguaño va celebrase una única convocatoria del nivel de competencia Intermediu B2, a la que van poder concurrir un máximu de 500 aspirantes. Les persones interesaes han presentar les sos solicitúes d’almisión ente esti xueves, día 6, y el próximu vienres 14 de febreru nos siguientes centros: IES Aramo, n’Uviéu; IES Calderón de la Barca, en Xixón; IES Carreño Miranda, n’Avilés; o IES Bernaldo de Quirós, en Mieres. Amás, van poder presentar les sos solicitúes d’almisión al traviés de los órganos señalaos nel artículu 16.4 de la Llei 39/2015, de 1 d’ochobre, del Procedimientu Alministrativu Común de les Alministraciones Públiques. El llistáu d’inscripción definitivu va publicase’l 20 d’abril.
Los exercicios de les cinco partes que componen la prueba de certificación de llingua asturiana van realizase en dos bloques. Nel bloque 1, que se va realizar el vienres 29 de mayu, van tener llugar los exercicios correspondientes a les partes de comprensión de testos escritos, de compresión de testos orales y de producción y coproducción de testos escritos. Nel bloque 2, que se va realizar en xornaes distintes a partir del xueves 21 de mayu, van llevase a cabu los exercicios correspondientes a la parte de producción y coproducción de testos orales y a la parte de mediación.
Les sedes escoyíes pa la realización d’estes primeres pruebes de acreditación son la Facultá de Formación del Profesoráu y Educación, onde se va desarrollar íntegramente el bloque 1, y el IES Aramo, onde los aspirantes van realizar les pruebes correspondientes al denomináu bloque 2.
Tres esti primer exame, el Gobiernu d’Asturies va convocar polo menos una vez al añu pruebes de certificación de llingua asturiana pa un mínimu d’ún de los niveles (A1, A2, B1, B2, C1).