(EUROPA PRESS) L’históricu sindicalista asturianu Manuel Fernández ‘Lito’, exsecretariu xeneral de MCA-UXT, morrió esta madrugada a los 67 años d’edá nel Hospital Central d’Asturies, n’Uviéu, según confirmaron fontes del sindicatu.
‘Lito’ averóse ayeri al hospital en sintiéndose indispuestu dempués de que recientemente se-y practicara una operación de corazón, señalaron a Europa Press fontes cercanes al sindicalista.
La trayectoria sindical de ‘Lito’ abarcó más de 35 años, diez como secretariu xeneral d’UXT Asturies, otros diez como máximu responsable de la Federación Siderometalúrxica y, a lo último, quince al mandu de MCA-UXT.
Del cargu de secretariu xeneral de MCA-UXT despidióse hai malpenes unos meses. N’ochobre del 2013, mientres l’últimu Congresu de la federación, ‘Lito’ dexó’l testigu a Carlos Romero, anque quedó col cargu institucional de presidente de MCA-UXT.
Foi ‘Lito’ el que decidió nun siguir al mandu de la Secretaría Xeneral de MCA-UXT. Quería «xente nuevo» nel sindicatu pa que se ficieren «cambios estructurales» na organización. «25 años son munchos», dixo, refiriéndose al tiempu que pasó al mandu de la federación del metal d’UXT (los primeros diez col nome de Federación Siderometalúrxica y los otros quince yá coles sigles MCA).
Cuando anunció en mayu del 2013 la so renuncia a presentase a la reelección na Secretaría Xeneral de MCA-UXT, ‘Lito’ siempre dexó claro que la so marcha yera «voluntaria» y que naide-y lo plantegó. Tanto ye asina, que desveló qu’el mesmu secretariu xeneral d’UXT, Cándido Méndez, recibió la noticia con «sorpresa». «Supongo que nun-y fizo nenguna gracia», comentó ‘Lito’ daquella.
Manuel Fernández ‘Lito’ taba convencíu de que los sindicalistes «nunca se xubilen». Na so despidida de la Secretaría Xeneral de MCA-UXT llanzó un mensaxe contundente, una traza que siempre lu caracterizó, col que pidía al sindicatu que se movilizara más p’averase a los trabayadores y afiliaos: «Hai que salir a la cai y arrimar l’hombru», dicía.
La Comisión Executiva Federal de MCA-UXT llamentó «fondamente» nun comunicáu’l fallecimientu de ‘Lito’ y espresó la so solidaridá cola familia y los sos compañeros.
AFILIÁU A UXT DENDE 1976
‘Lito’, nacíu en Mieres (Asturies) en 1947 y espertu sociollaboral pola UNED d’oficiu, entamó la so trayectoria profesional na empresa siderúrxica Ensidesa, onde yá en 1976 afilióse a la UXT.
Entamó la so trayectoria sindical al salir escoyíu responsable de la Estaya Sindical d’UXT en Veriña y ente 1977 y 1979 ocupó la Secretaría d’Organización d’UXT Asturies. Darréu y mientres una década (ente 1979 y 1988) exerció como secretariu xeneral d’esta organización.
Na so trayectoria política foi miembru de la Executiva de la Federación Socialista Asturiana, siendo diputáu rexonal nes dos primeres llexislatures.
En 1988 y en congresu estraordinariu, ‘Lito’ salió escoyíu secretariu xeneral de la Federación Estatal de Siderometalúrxica d’UXT (UGT-Metal), y reelexíu en 1990. Ocho año dempués designáronlu secretariu xeneral de Metal, Construcción y Afines d’UXT, Federación Estatal (MCA-UXT), organización nacida de la fusión de la Federación Siderometalúrxica d’UXT y de la Federación de Construcción, Madera y Afines (FEMCA-UXT), cargu nel que lu reelixeron socesivamente hasta que n’ochobre del 2013 decidió nun presentase.
‘Lito’ foi conseyeru de l’antigua Aceralia, d’Arcelor y d’ArcelorMittal y vicepresidente de la Federación Europea de Metalúrxicos (FEM), güei denominada IndustriAll Europe, lo mesmo que de la Federación Internacional Trabayadores Industries Metalúrxiques (FITIM ), nesti momentu denominada IndustriAll Global Union.