(EUROPA PRESS) El secretariu xeneral del Grupu Socialista nel Congresu y candidatu a liderar el PSOE, Eduardo Madina, esclaró esti martes que les consultes «llegales» que defende sobre Cataluña y el modelu territorial son les «previstes na Constitución pal conxuntu d’España».
Asina lo esplicó na so cuenta personal de Twitter, onde publicó esti mensaxe «pa evitar tracamundios», dempués de qu’ayeri asegurara na Cadena Ser que vería bien una consulta en Cataluña «si ye dientro de la llegalidá», lo qu’interpretaron dalgunos como un posicionamientu a favor del derechu a decidir que defende’l PSC y hasta agora refuga’l PSOE.
«Pa evitar tracamundios: les consultes llegales qu’acepto son les que tán previstes na constitución pal conxuntu d’España», esplicó esti martes el candidatu, que yá s’esplicó nun actu con militantes ayeri n’Asturies.
En declaraciones a los periodistes calcó en que siempre va actuar dientro de la llegalidá y que lo que pretende facer el presidente de la Generalitat, Artur Mas, «ta fuera del marcu constitucional y fuera de la llegalidá». Asina, abrió la puerta a reformes nel futuru, pero «siempre dientro de los procedimientos llegales y cola busca d’amplios consensos».