(EUROPA PRESS) L’Índiz de Precios de Consumu (IPC) subió n’Asturies nel mes de mayu nuna décima (0,1%) sobre’l mes anterior, según datos publicaos esti martes pol Institutu Nacional d’Estadística (INE). Esa leve subida dexa la tasa interañal nel 0,1 por cientu.
Los precios que más subieron n’Asturies al respecto d’abril son los de vistíu y calzáu, un 3,5%. Tamién subieron los del capítulu de ‘otros’ (0,3%) y tresporte (0,2%). Pela so parte los precios de bebíes alcohóliques y tabacu, vivienda, y enseñanza nun variaron respecto al mes anterior.
Baxaron, sicasí, los relativos a ociu y cultura (-1,6%), medicina (-0,7%), alimentos y bebíes non alcohóliques (-0,5%) artículos domésticos (-0,2%), hoteles, cafés y restoranes (-0,2%) y comunicaciones (-0,1%).
Polo que se refier a la tasa interañal, ye dicir la diferencia col mesmu mes del añu anterior, rexistráronse subíes en vivienda (3,3%), enseñanza (1,8%), bebíes alcohóliques y tabacu (1,6%), tresporte (0,8%), hoteles, cafés y restoranes (0,5%), otros (0,5%), y vistíu y calzáu (0,3%).
Al respecto de mayu del 2013 baxaron, sicasí, los precios de comunicaciones (-5,9%), ociu y cultura (-2,2%), menaxe (-1,6%), medicina (-1,3%) y alimentos y bebíes non alcohóliques (-0,6%).
DATOS NACIONALES
A nivel nacional l’IPC caltiénse sin cambios en mayu respecto al mes d’abril, pero baxó dos décimes la so tasa interañal, hasta’l 0,2%, pol abaratamientu de los alimentos y de los viaxes y hoteles tres la celebración de la Selmana Santa.
D’esta manera, l’IPC interañal encadena dos meses en positivo tres la tasa negativa del 0,1% que rexistró’l pasáu mes de marzu. Col datu del quintu mes del añu, yá son nueve los meses nos que l’IPC interañal desplazóse en tases bien baxes, de malpenes unes décimes.
L’últimu mes nel que los precios rexistraron una tasa más avezada pa la economía española foi’l d’agostu, cuando l’IPC quedó nel 1,5%. A partir d’ehí, en parte pol ‘efectu pasu’ de la subida del IVA aplicada nel 2012, l’IPC dio un importante baxón.
Nos cinco primeros meses del añu, l’IPC acumula una tasa del -0,3%, mientres qu’en tasa mensual (mayu sobre abril), los precios caltuviéronse sin cambios, frente a la subida del 0,2% qu’esperimentaron en mayu del 2013 o’l repique del 0,9% que rexistraron n’abril pol efectu de la Selmana Santa.
L’estancamientu mensual de los precios rexistráu en mayu diose por cuenta de que les baxaes esperimentaes polos precios de los viaxes, alimentos y hoteles viéronse compensaes pol encarecimientu de les gasolines y del vistíu y del calzáu pola temporada primavera-branu.
Pela so parte, l’Índiz de Precios de Consumu Harmonizáu (IPCA) quedó en mayu nel 0,2%, una décima perbaxo de la tasa añal rexistrada n’abril (0,3%). En tasa mensual, l’IPCA nun esperimentó variaciones en mayu.