(EUROPA PRESS) Los líderes del G-7 -grupu qu’axunta a Estaos Uníos, Canadá, Xapón, Francia, Alemaña y Italia- apostaron nel conceyu celebráu güei pol «diálogu» con Rusia p’alcontrar una «solución constructiva» a la crisis n’Ucrania y aplazaron pel momentu l’activación de nueves sanciones contra Moscú, anque caltienen l’amenaza sobre la mesa si’l presidente Vladimir Putin nun da más pasos pa baxar la tensión.
Ésti ye’l mensaxe común que va tresmitir a Putin la canciller alemana, Angela Merkel, el presidente francés, François Hollande, y el primer ministru británicu, David Cameron, cuando s’axunten con él por cuenta de los actos de conmemoración del 70 aniversariu del desembarcu de Normandía, principiu del fin de la Segunda Guerra Mundial, que se celebren el vienres en Francia.
Hollande dio a entender qu’espera amás que Putin se reúna mientres estes celebraciones col nuevu presidente ucranianu, Petro Poroshenko. A ambos convidáronlos y Putin confirmó la so asistencia en conociendo la presencia de Poroshenko. «Yo sabía lo que podía provocar, l’alcuentru con Vladimir Putin», dixo’l presidente galu.
En tou casu, los líderes del G-7 recalcaron la so condena a la «violación continua» per parte de Rusia de la soberanía y la integridá territorial d’Ucrania. «L’anexón illegal de Crimea per parte de Rusia y les actuaciones pa desestabilizar l’este d’Ucrania son inaceptables y tienen de detenese», señala’l comunicáu conxuntu aprobáu mientres la primer xornada del conceyu.
Les potencies occidentales esixen a Rusia «reconocer el resultáu de les elecciones (presidenciales), completar la retirada de les sos fuerces militares de la frontera con Ucrania, detener el fluxu d’armes y militantes al traviés de la frontera y exercer la so influencia ente los separatistes armaos pa qu’abandonen les armes y arrenuncien a la violencia».
«Tamos llistos pa intensificar les sanciones selectives y aplicar midíes restrictives adicionales significatives pa imponer costos adicionales a Rusia si los acontecimientos lo exixen», amenaza la declaración del G-7.
«Lo principal ye ser constructivos, intentar alcontrar un acuerdu constructivu y utilizar les canales de comunicación abiertes», señaló Merkel, que destacó la importancia de que se celebraren les elecciones presidenciales. Sicasí, avisó de que «si nun hai progresos» nes demandes del G-7 a Rusia «vamos tener que considerar sanciones del nivel 3 (económiques) porque nun podemos permitir más desestabilización n’Ucrania».
La cuestión de les sanciones contra Rusia volverá examinase nel conceyu de líderes europeos del 26 y 27 de xunu, anque la canciller dexó claro que «nun va haber automatismu» sinón que los líderes tendrán que volver a evaluar l’actuación de Moscú.