El Teatru Filarmónica d’Uviéu va acoyer los vienres 8, 15, 22 y 29 del próximu mes de payares les representaciones de les obres finalistes qu’opten al III Premiu de Teatru Profesional Nel Amaro en llingua asturiana.
Tres una preselección realizada mientres la primer quincena d’ochobre pol xuráu —integráu por especialistes en teatru y llingua asturiana—, les cuatro compañíes teatrales finalistes y que van participar nesti III Festival Nel Amaro son, por orde d’actuación:
- Ververemos, col espectáculu Muyeres inesperaes.
- El Callejón del Gato, col espectáculu Crecer.
- Higiénico Papel Teatro, col espectáculu Una casa.
- Factoría Norte, col espectáculu Les rellaciones peligroses.
El Premiu de Teatru Profesional Nel Amaro en llingua asturiana o gallego-asturianu convócase cola mira de consolidar, arriquecer y prestixar estes dos llingües nel ámbitu del arte dramático, y nesta tercer edición ta dotáu con 6.000 euros. La entrega del gallardón va tener llugar nuna ceremonia na que va compartir protagonismu con quien llograren los premios lliterarios en llingua asturiana nes categoríes de cómic, ensayu, lliteratura infantil y xuvenil, novela y poesía que convoca tamién el Gobiernu del Principáu d’Asturies.
El premiu y festival lleva’l nome de Nel Amaro, autor turonés que falleció nel 2011 y que nos años últimos de la década de los setenta del sieglu pasáu abrió’l camín pa la vanguardia teatral n’asturianu. Ente les sos obres de teatru destaquen Xénesis o alborá de la concencia (1978), Glayíos nueos, vieya murnia (1979), L’únicu rebalbu (1980) y Antígona, por exemplu, que ganó’l premiu de teatru de l’Academia de la Llingua Asturiana en 1991. Les manes en caxón (2003) foi la so última publicación teatral.
Na edición pasada d’esti premiu, l’espectáculu ganador resultó ser Hansel y Gretel, d’Higiénico Papel Teatro.