(EUROPA PRESS) L’Audiencia Nacional declaró nulu l’Espediente de Regulación d’Empléu (ERE) en Coca-Cola Iberian Partners (CCIP), qu’afectaba a 1.190 emplegaos y que supunxo’l zarru de cuatro plantes, lo que conlleva la reincorporación de los trabayadores afectaos a los sos puestos de trabayu, según informaron a Europa Press en fontes conocedores de la sentencia.
La compañía executó a lo último 821 despidos de los 1.190 que contemplaba l’espediente, que tendrán que realmitir la empresa col abonu de los salarios dexaos de percibir.
D’esta forma, la sala de lo Social de l’Audiencia Nacional envalora les demandes de los sindicatos UXT, CC.OO. y CSI-F contra la decisión de la empresa d’aplicar l’ERE, argumentando causes organizativas y productive.
La Sala esplica que l’orixe del conflictu provién de la fusión de los ocho embotelladores que la marca tenía na Península Ibérica nuna sola, nun procesu d’integración nel que resultó Coca-Cola Iberian Partners como compañía autorizada pa preparar y envasar les bebíes n’España y Portugal.
Frutu d’esa fusión, la compañía punxo en marcha una serie d’axustes que-y permitieren un aforru de costos, ente los que figuraba reducir la plantiya al traviés de delles midíes como les prexubilaciones, les baxes incentivaes o les recolocaciones, asina como los despidos forzosos en casu de que nun se llegara al oxetivu de la reestructuración.
Los sindicatos negáronse a aceptar l’acuerdu si ello suponía’l zarru de fábriques, como efectivamente asocedió coles de Fuenlabrada, Palma de Mallorca, Alicante y Asturies.
Agora, según señalaron fontes xurídiques, la sala de lo Social declaró nulu’l despidu colectivu por cuanto’l nuevu empleador ye un grupu d’empreses llaboral que nunca se constituyó formalmente como empresariu, nun informando nin negociando’l cambiu d’empresariu colos representantes de los trabayadores, que s’atoparon «sorpresivamente» con dichu cambiu al convocalos pa negociar el despidu colectivu, a pesar de caltenese d’alta caún pa la so empresa respectiva.
«Prodúxose, poro, un completu y manifiestu incumplimientu de les obligaciones d’información, consulta y negociación nel supuestu de cambiu de titularidá de la empresa. Y nun se trata d’un incumplimientu del pasáu (…), ye un incumplimientu que se caltién nel presente y proyéctase sobre’l periodu de consultes del despidu colectivu, porque nesi momentu la información y documentación sobre la constitución del grupu yera tovía incompleta», señalen los xueces.