(EUROPA PRESS) Los votos de PSOE y PP valieron esti vienres pa que la segunda llei de reestructuración del sector públicu autonómicu, qu’afecta a Radio Televisión del Principáu d’Asturies (RTPA), supere’l trámite de totalidá na sesión plenaria na Xunta Xeneral del Principáu d’Asturies (JGPA).
Los grupos citaos refugaron les enmiendes a la totalidá que presentaron Foru y Grupu Mistu (UPyD), que pidíen asina la devolución del proyectu. IU astúvose na votación. D’esta manera, la llei pasa al siguiente trámite, el de les enmiendes parciales, previu al de la so aprobación.
Foi la conseyera de Facienda, Dolores Carcedo, la que defendió les bondaes del proyectu, indicando que al desapaecer l’Ente Públicu de Comunicación y fundise los trés sociedaes actuales nuna única empresa pública, va haber una xestión «más áxil, eficaz y eficiente». Añadió que la llei va suponer la reducción del númberu d’integrantes, tanto del Conseyu d’Alministración como del Conseyu de Comunicación.
Respectu al primeru, manifestó que los sos miembros van tener un perfil «más profesional y técnicu». La llei crea amás un nuevu conseyu, el d’Informativos, que «va velar pola independencia y oxetividá de la Radiotelevisión del Principáu», dixo Dolores Carcedo.
Les esplicaciones de la dirixente rexonal nun convencieron a la vocera de Foru, Cristina Coto, que tachó de farsa la norma y calificóla de «operación puramente estética». Al so xuiciu, la televisión rexonal va siguir xestionada por «comisarios políticos» y recordó’l pasáu nos gabinetes del Gobiernu socialista asturianu tanto del director de la RTPA como del director d’Informativos.
Coto dixo qu’amás la RTPA caracterizóse poles sos «irregularidaes» en materia de personal, con sentencies contraries por cesión illegal. Dende Foru aseguraron qu’apuesten por una televisión pública, pero que seya austera, que respete la llegalidá y que «nun destruya» el sector audiovisual asturianu como, al entender de Coto, ta asocediendo.
Pela so parte, Ignacio Prendes (UPyD) tamién defendió la so enmienda a la totalidá, al calificar el proyectu de «engañu» del Gobiernu rexonal. Según el diputáu nun existe una voluntá real de reestructuración y too llléndase a una operación de «maquillaxe y llaváu de cara».
Noemí Martín, pela so parte, intervino pa xustificar la so astención na votación, non porque tea d’acordies coles enmiendes de totalidá, sinón porque lo decide asina «con calter preventivu», puesto que son delles les enmiendes parciales que quieren que salgan alantre p’aprobar el proyectu. Martín tamién foi bien crítica contra la xestión de la RTPA, especialmente no que se refier al personal.
El diputáu del PP Agustín Cuervas-Mons defendió la «coherencia» de la so formación en tolo que se refier a les crítiques a la dimensión del sector públicu autonómicu. Asina, manifestó que foi namás el PP el que presentó enmiendes a la primer llei de reestructuración. Tocantes a la llei qu’afecta a la RTPA, el PP almitió que la considera «insuficiente». Sicasí, consideró que refugar el proyectu «a estes altures de llexislatura» nun sería la más acertada. «Ye perpequeñu, pero ye un «pequeñu pasu», indicó y por eso decidieron votar en contra de les enmiendes.
A lo último, el diputáu del PSOE José María Pérez afirmó que’l sector públicu asturianu ye «axustáu». Dixo que la RTPA nun destruyó empléu, sinón que lo creó nel sector audiovisual asturianu. «Y puen facese más coses aprovechando esa plataforma», afirmó. «Hai errores que se cometieron nel pasáu y hai que deprender d’ellos», almitió. La nueva llei, remató, va valir pa garantizar la pluralidá».