(EUROPA PRESS) La Llei d’Acción Integral en Materia de Drogues, na que trabaya’l Gobiernu autonómicu, nun va prohibir les celebraciones conocíes como barres llibres y tampoco va estremar ente bebíes fermentaes y destiladas, como se demandaba dende ciertos sectores hosteleros.
El proyectu sometióse a alderique esti llunes na Comisión Parlamentaria de Sanidá, onde atropó’l preste inicial, caún colos sos matices, de PSOE, PP, IU y UPyD. Foru Asturies aplaudió’l so desarrollu, pero criticó duramente que l’aumentu de la edá de la prohibición de consumu d’alcohol a los 18 años llegue con retrasu n’Asturies, amás d’otres cuestiones, como la «estigmatización» de les persones que sufren dependencies.
El conseyeru de Sanidá, Faustino Blanco, foi esclariando a los grupos políticos delles cuestiones. Ente elles la supuesta prohibición de barres llibres, que preocupaba a les asociaciones hosteleres. «Taben trabayando con un testu anterior», señaló, pa dexar bien claro que nel borrador presentáu esti llunes nun se recueye esa prohibición.
Tamién destacó, a entrugues de Foru Asturies, que les midíes restrictives nun van llendase llindar a les bebíes destilaes, sinón que van afectar tamién a la sidra y la cerveza. «Lo que cuenta ye l’alcohol en sangre», matizó’l conseyeru, tres insistir el diputáu forista, Albano Longo, que n’otres comunidaes sí se realizó esta distinción.
Sí matizó, el responsable de Sanidá, que la prohibición de campañes publicitaries de bebíes alcohóliques va respetar aquelles iniciatives de promoción de productos autóctonos o con denominación d’orixe, tales como la sidra o’l vinu, nel casu d’Asturies.
Amás d’elevar la edá de prohibición de consumu d’alcohol a los 18 años, aplica les mesmes midíes restrictives nel casu del tabacu que la llei estatal, anque s’añade la prohibición de fumar nes marquesines cubiertes con panales que seyan llugares d’espera del tresporte, asina como nos espacios con cubierta y fondura superior a un metru, creaos pol retranqueu o meyora sobre fachaes de centros, establecimientos o llugares nos que, de la mesma manera, nun puea fumase.