José Ángel Gayol lleva’l Premiu Máximo Fuertes Acevedo d’ensayu n’asturianu

L’escritor José Ángel Gayol —alcuñu lliterariu de José Ángel García Fernández— resultó ganador de la XXV edición del Premiu «Máximo Fuertes Acevedo» d’Ensayu n’asturianu, que concede la Conseyería de Cultura, Política Llingüística y Turismu.

El xuráu encargáu de valorar les obres presentaes reunióse na tarde d’ayeri baxo la presidencia del director xeneral de Política Llingüística, Antón García Fernández, y tuvo formáu pol escritor Damián Barreiro Maceiras, ganador de la edición pasada; la profesora y crítica lliteraria Marta López Fernández y la profesora de la Facultá de Filosofía y Lletres Cristina Valdés Rodríguez

Ente les obres presentaes, el xuráu decidió por mayoría conceder el premiu a la titulada El silenciu invisible, que se presentó col seudónimu Albert Camus, al reconocer nella «la so fondura intelectual, la capacidá d’análisis de la realidá a partir de les obres pictóriques y l’habilidá pa texer idees y afirmaciones de calter políticu, filosóficu o social, dando voz a lo que nun s’oi y lluz a lo que nun se ve», según destaca l’acta.

A esti gallardón, dotáu con 5.000 euros, podíen presentase obres de tema, xéneru y estructura llibre que reunieren les característiques del xéneru ensayísticu entendíu na so amplitú.

José Ángel Gayol (Mieres del Camín, 1977), persona d’amplia formación y distintes inquietúes lliteraries, sociales y polítiques, ye escritor y críticu lliterariu. Depués de ganar el Premiu Asturias Joven de Poesía n’añu 2006, empecipió una amplia y fecunda carrera lliteraria con incursiones en dellos xéneros —novela, poesía, teatru y ensayu— y reconocimientos importantes, ente los que s’incluyen los premios de poesía «Elvira Castañón», «Fernán Coronas» y «Xuan María Acebal», o’l mesmu Premiu d’Ensayu «Máximo Fuertes Acevedo», que yá llogró nel 2015 cola obra Vértigu.

No que fai a la so faceta de críticu lliterariu, Gayol ye autor de bien de reseñes crítiques publicaes en periódicos y revistes como Clarín, Reloj de Arena, Paralelo Sur, Formientu, esTandoriu o’l diariu La Nueva España, ente más otros.