L’adecuación de los túneles asturianos a la normativa de seguridá vial de la Unión Europea (UE), aprobada en 2006, va esixir una inversión de siquier 50 millones de euro pero, hasta la fecha, en nengún de los 43 esistentes na rede viaria estatal nel Principáu, acometióse obra dalguna pa cumplir cola lexislación comuñal. El senador d’IX, Jesús Iglesias, denunció esta mañana que, a pesar de que la fecha tope pa realizar estos trabayos expira en 2019, entá nun hai previsiones reales pa la so execución. “Dáu l’escenariu d’axuste presupuestariu que s’anuncia pa 2015 nun creo que tengamos nengún a posibilidá los asturianos de que, na fecha fita, los nuesos túneles cumplan eses esixencies de seguridá de la UE”.
Iglesias, que solicitara información al Gobiernu sobre esta adaptación, esplicó que, a pesar de trescurrir yá 8 años desque s’aprobó’l cumplimientu de les nueves regulaciones mercé al Real Decreto 635/2006, el balance nun puede ser más negativu: de los 280 túneles nos qu’había qu’actuar en tol territoriu español, con una inversión calculada primeramente en 456 millones (más lo que demanden los túneles sometíos a concesión) namá s’afixeron catorce y otros dos tán n’obra, por un importe de 53,1 millones. D’ellos, nengún ye asturianu.