Izquierda Xunida apuesta por alcuerdos en materia fiscal que se traduzan, tamién, n’alcuerdos presupuestarios. El voceru parlamentariu na Xunta Xeneral, Gaspar Llamazares aseguró güei, tres la celebración de la Comisión de Facienda, que ye imprescindible aprovechar el diálogu en materia fiscal p’ameyorar tamién la xusticia del sistema pero, tamién, pa garantizar a la ciudadanía la calidá de los sos servicios públicos. La corrección del erru de saltu, la llucha contra’l fraude tien que ser prioritarios pero ensin perder de vista que l’oxetivu tien que ser dar respuesta a les necesidaes d’Asturies.
“Tenemos nesta materia voluntá por qu’haya una cuerdu fiscal, pero por que vaya más allá, por que sía la base sólida sobre la qu’asitiar un alcuerdu presupuestariu”, afirmó Llamazares para quien tendría pocu sentíu algamar pactos en materia de recaudación pero non de gastu. “Nun vamos aldericar nin alcordar en minoría aspecto de fiscalidá que depués non se traduzan nuna meyora de los servicios públicos o nun alcuerdu presupuestariu. Por tanto, nós faemos esta negociación con talante de mayoría, cola actitú de qu’haya una mayoría d’esquierdes na reforma fiscal que depués se traduza nuna mayoría d’esquierdes nos presupuestos”.
Gaspar Llamazares encamentó al Gobiernu por que lidere una mayoría d’esquierda, pa lo que-y pidió que s’axunte “lo más posible coles fuerces polítiques” p’algamar un alcuerdu. “Nes sos manos ta y por nós nun va faltar una voluntá d’alcuerdu”. Y ye que, según el voceru d’IX, Asturies nun puede asitiase nuna prórroga permanente. “Nós vamos comprometer con una mayoría que sofite la reforma fiscal, per una parte, pero, per otru llau, el presupuestu de la Comunidá Autónoma”.