(EUROPA PRESS) El conceyal d’Izquierda Unida nel Conceyu d’Uviéu Emilio Huerta ‘Triqui’ esplicó esti xueves que la dirección autonómica de la organización llegó a encarga-y la creación d’una comisión pa crear un sistema d’elección de candidatos por primaries. Sicasí, na tercer reunión «llegó Angelín cola so xente mandó parar», matizó, n’alusión al antigüu voceru de la formación na Xunta Xeneral, Ángel González.
Asina lo señaló mientres una rueda prensa convocada pol so Grupu Políticu municipal p’anunciar la presentación d’una moción al Conceyu d’Uviéu a favor de la celebración d’un referndu sobre la continuidá de la monarquía. Compareció acompañáu de los sos compañeros de grupu, Alejandro Suárez y Roberto Sánchez Ramos.
Suárez y Huerta refiriéronse al discutiniu qu’enfrenta a l’actual dirección autonómica d’IU col sector críticu que demanda la elección de candidatos por primaries abiertes, mandatu acordáu na última asamblea, según recordaron. «Había un añu de plazu y yá llevamos dos», añadió Suárez.
Huerta foi más allá, y esplicó que pa facer efectivu esi mandatu «a mi llámaseme per parte del coordinador xeneral un día. Alcuéntrome con él y col secretariu d’Organización y con otra persona más pa que llancemos yá una comisión, na que polo visto yo diba xugar un papel importante na mesma». «Empezamos mui bien, celebramos dos reuniones, y na tercer xunta llegó Angelín cola so xente y mandó parar», criticó.
Dende entós, según Huerta, «nun hubo más xuntes nin se mos dieron esplicaciones». «Otra vez a metese dientro de casa, zarrase nun sacu y enclaustrar la organización», afirmó, tres una vehemente defensa del aberturismu políticu d’Izquierda Unida. «Nun toi d’acuerdu cola vieya guardia que yéramos», señaló. «Inculcábenmos facelo too en casa, siempre zarraos. Yeren polítiques pa facer lo que queríen cuatro», apuntó’l conceyal.
Suárez calcó na demanda de primaries que defenden, xunto cola d’Uviéu, delles asamblees llocales d’Izquierda Unida d’Asturies. Recuerda qu’esta posibilidá surde d’un mandatu de la última asamblea y que tenía un plazu d’un añu «y yá llevamos dos». «Hai qu’abrir esta organización yá, ponese d’acuerdu nun sistema y tener un calendariu pa la elección de los nuesos representantes», consideró. «La última asamblea ganóla una candidatura llamada Voces pal Cambiu (de la que formaba parte’l coordinador xeneral autonómicu, Manuel Orviz); pues les voces más reales son les de les últimes elecciones europees. Nun faigamos analises burocráticos nin defensivos», pidió Suárez.