La compañía Higiénico Papel Teatro resultó ganadora de la segunda edición del Premiu Nel Amaro de Teatru Profesional en llingua asturiana y gallego-asturianu, que concede la Conseyería d’Educación y Cultura.
El xuráu encargáu de valorar les obres finalistes reunióse na tarde del 27 de payares, baxo la presidencia del director xeneral de Planificación Llingüística y Normalización, Fernando Padilla Palicio, y tuvo formáu por Eva Vallines Menéndez, actriz y crítica teatral; Esther Castro Manzano, responsable del Serviciu de Normalización Llingüística de Siero; Cristina Muñiz Martín, escritora; José Ramón Iglesias Cueva, secretariu de l’Academia de la Llingua Asturiana, y Roberto Corte Martínez, director y críticu teatral.
Ente les cuatro obres finalistes, que se representaron a lo llargo del mes de payares nel Teatru Filarmónica d’Uviéu, el xuráu decidió por mayoría conceder el premiu al espectáculu Hansel y Gretel, de Higiénico Papel Teatro, al reconocer nél “Una adaptación fecha con muncha sensibilidá, humor y inxeniu, onde se mecen los personaxes del cuentu colos de la obra y los intérpretes, nun cenciellu y rellumante xuegu metateatral, fechu con un gran procuru llingüísticu”, según destaca l’acta.
El xuráu quixo tamién destacar la gran calidá de toles obres finalistes, lo que dificultó muncho la decisión.
Al Premiu Nel Amaro, dotáu con 6.000 euros y una pieza artística, podíen presentase empreses del sector profesional dedicaes a la producción y representación d’espectáculos teatrales, teniendo acoyida tanto los espectáculos orixinales como les obres dramátiques yá existentes y les versiones o adaptaciones d’espectáculos representaos orixinalmente n’otra llingua.
Na primer edición del premio, el ganador foi Carlos Alba Cellero, cola obra Llázaro de Tormes.
Hansel y Gretel, dirixida por Laura Iglesia, avéranos una visión mui personal del clásicu de los hermanos Grimm onde amuesa lo poco que ye menester pa poder crear mundos onde la única llende ye’l nuestru maxín. Un espectáculu pa tola familia, interpretáu por Félix Corcuera, Carlos Dávila y Laura Iglesia, onde poder disfrutar toos por igual, los más pequenos afayando una forma distinta y cercana de vivir una historia y los más grandes viviendo alcordances d’una infancia de cuentos.
Higiénico Papel Teatro lleven ventidós años d’esperiencia ininterrumpida y más de trenta espectáculos producíos y estrenaos siempre con gran éxito de públicu y crítica qu’avalen la trayectoria d’esta compañía, con un ampliu repertorio que destaca pola diversidá temática y espresiva de les sos propuestes, marcaes por un elegante sellu personal que conxuga toques d’humor, provocación y poesía. El compromiso cola calidá y el rigor de les sos producciones fai que seyan consideraos como una de les compañíes de referencia na cartelera asturiana con una notable repercusión a nivel nacional.