El xuráu del premiu Nel Amaro de teatru profesional en llingua asturiana escueye los cuatro finalistes

El xuráu del Premiu de Teatru Profesional Nel Amaro en llingua asturiana escoyó los cuatro finalistes que van optar al gallardón na so cuarta edición. Les obres escoyíes van conformar el programa del IV Festival Nel Amaro y van representase nel Teatru Filarmónica d’Uviéu los cuatro primeros vienres d’esti mes d’ochobre.

El premiu Nel Amaro ta convocáu pola Conseyería de Cultura, Política Llingüística y Turismu nel contestu de los premios lliterarios que convoca, y establecíu pa que se presenten empreses del sector profesional dedicaes a la producción y representación d’espectáculos teatrales.

El xuráu, integráu por especialistes en teatru y llingua asturiana y presidíu pol director xeneral de Política Llingüística, Antón García, escoyó los siguientes trabayos pa la so representación nel IV Festival Nel Amaro nes feches indicaes:

  • El pelegrín valiente, de Producciones nun Tris (2 d’ochobre)
  • La neña de les trences al revés, d’El Callejón del gato (9 d’ochobre)
  • El viaxe de Covaleti, de Higiénico Papel (16 d’ochobre)
  • El viaxe de Dorothy, de Fantastique Company (23 d’ochobre)

El Premiu de Teatru Profesional Nel Amaro, dotáu con 6.000 euros, convócase cola mira de consolidar, arriquecer y prestixar la llingua asturiana y el gallego-asturianu nel ámbitu del arte dramáticu. La pasada edición del gallardón tuvo como ganador al espéctaculu Les relaciones peligroses, de la compañía Factoría Norte.

El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral n’asturianu. Nel Amaro ganó’l premiu de teatru de l’Academia de la Llingua Asturiana en 1991.