Güei martes, la viceconseyera de Mediu Ambiente y Cambéu Climáticu, Nieves Roqueñí, axuntóse col alcalde de Tinéu, José Ramón Feito, mientres la xunta encetóse’l proyectu de meyora de la calidá de la estación depuradora d’agües residuales (EDAR) de Tinéu.
Roqueñí informó al alcalde de que les obres, yá axudicaes, van empecipiase esti branu, una vegada rematada la tramitación de les espropiaciones, con una inversión cercana a los 740.000 euros. Los trabayos tamién inclúin la canalización de los arramaos de los núcleos d’El Cruceru, Santolaya, Zarracina y Valdarieme, que na actualidá nun tán xuníos a la rede. Amás, va doblase’l colector d’entrada al alliviaderu d’Ociu, una infraestructura soterrada destinada a regular los caudales pertenecientes a la rede de saneamientu de Tinéu, y van sustituyise los cuatro pozos del colector de La Curiscada por pozos de resalto. Les obres, que van concluyir cola pavimentación de viales y reposición de servicios y terrenes afectaos, van ser cofinanciaes pol Fondu Européu de Desenvolvimientu Rexonal (Feder) y van tener un plazu d’execución de 12 meses.
Per otra parte, mientres l’alcuentru, na que tamién participó la directora xeneral de l’Agua, Vanesa Mateo, analizáronse les necesidaes de saneamientu n’El Valle y repasáronse les actuaciones previstes nel plan director de suministru pal conceyu de Tinéu.