El Principáu pon en marcha la campaña #Apúntate

Les conseyeríes d’Educación y de Cultura, Política Llingüística y Turismu punxeron en marcha la campaña #Apúntate col fin d’animar a los alumnos asturianos a matriculase nes asignatures de Llingua Asturiana y Lliteratura y de Gallego-asturianu pal cursu 2020-21.

Dambos departamentos señalaron que cola promoción quier facese llegar a la sociedá, y n’especial a les persones implicaes na enseñanza, el compromisu del Gobiernu asturianu pa cola llingua asturiana y pa col gallego-asturianu.

La declaración del estáu d’alarma’l pasáu mes de marzu retardó mesmo’l procesu de matriculación nos centros como’l llanzamientu de la campaña. Agora, n’estableciéndose les feches de matrícula pola Conseyería d’Educación, actívase la promoción.

La campaña #Apúntate ta diseñada pa llegar a los centros educativos al traviés de cartelería impresa, y pa espublizase peles redes sociales ya internet al traviés de cartelería dixital. Pa dala a conocer al públicu, la promoción apóyase en cuñes radiofóniques, que se van emitir na RPA, y nun anunciu de televisión que se va espublizar na TPA y al traviés de les redes sociales del Gobiernu d’Asturies. La promoción ta realizada n’asturianu y en gallego-asturianu mesmo na cartelería que nos anuncios radiofónicos y el spot de televisión.

La campaña trata de promocionar la matriculación n’asturianu, o en gallego-asturianu nel so ámbitu, en caúna de les fases educatives. Les feches para realizar la matrícula estableciéronse del 23 al 31 de xunetu para Educación Primaria, y del 23 al 31 de xunetu y 1 a 7 de setiembre pa la ESO y Bachilleratu.