La Conseyería de Salú echó voz de al Ministeriu de Sanidá 19 positivos de covid-19 correspondientes al día d’ayeri, de los que cuatro son contactos estrechos de casos conocíos.
El Serviciu de Vixilancia Epidemiolóxica ta estudiando’l venceyu epidemiolóxicu del restu de les andaes. Toles persones, sacante una que foi ingresada, presenten síntomes leves y tán n’aislamientu nes sos cases.
La Dirección Xeneral de Salú Pública recuerda que les persones qu’esperen la resultancia d’una PCR, sía por barruntu de casu o por estudiu de contactos estrechos, tienen de permanecer na so casa y acutar la so vida social.
Amás, les autoridaes sanitaries aportunen en que ye imprescindible que toles persones consideraes contactos estrechos cumplan rigorosamente la cuarentena, cuidao que el so incumplimientu puede suponer un riesgu pa la salú personal y poblacional.
Nesi sentíu, sollerten de la importancia de non banalizar la situación y piden a la población asturiana y a los visitantes qu’estremen les midíes de prevención y seguridá, tales como la llavadura frecuente de manos y el caltenimientu d’una distancia interpersonal de seguridá d’un metro y medio, a lo menos, con persones coles que nun se conviva.
Recuerden, coles mesmes, que l’usu del mázcaru ye obligatoriu n’Asturies pa mayores de seis años nes víes públiques y espacios al campu; en cualquier espaciu zarráu d’usu públicu o que s’atope abiertu al públicu, según nos medios de tresporte públicos y privaos; nesti últimu casu cuando los ocupantes nun moren nel mesmu llar.