(EUROPA PRESS) El PP refugó esti martes nel Congresu una proposición non de llei (PNL) sobre les infraestructures de tresporte ferroviariu nel Principáu d’Asturies y la Comunidá Autónoma de Castiella y Lleón, presentada conxuntamente pol PSOE y Izquierda Plural (IU-ICV-CHA), que pidía garantizar la puesta en marcha de la variante de Payares nel 2015.
La PNL, debatida mientres la Comisión de Fomentu del Congresu de los Diputaos, encamentaba al Gobiernu de Mariano Rajoy, ente otres coses, a «entainar les obres de la variante de Payares pa la so puesta en serviciu nel 2015» y promover el corredor ferroviariu Madrid-Llión-Xixón en defensa de la culminación de les obres de l’AVE.
Los parlamentarios encargaos de defender la PNL, Gaspar Llamazares d’IU y Maria Luisa Carcedo del Grupu Socialista, defendieron la necesidá d’esta infraestructura ferroviaria calcando na necesidá de «contribuyir pa dar un puxu al empléu» y a la cohesión social y territorial» de les dos comunidaes autónomes. Coles mesmes, ficieron un llamáu al PP pa qu’apoye esta iniciativa parlamentaria.
La iniciativa parlamentaria votóse nos sos propios términos a pesar de que los grupos parlamentarios del PP y el Grupu Mistu –a pidimientu del diputáu de Foru Enrique Álvarez Sostres– presentaron una y doce enmiendes, respectivamente, a la proposición non de Llei (PNL).
PP: «YÁ HAI UN COMPROMISU DEL GOBIERNU»
En concreto, el PP –na enmienda presentada– esixía al Executivu a «siguir» coles actuaciones previstes nel Plan d’Infraestructures Tresporte y Vivienda (Pitvi) pal corredor ferroviariu Madrid-Lleón-Asturies. Con esta PNL, dixo, «ta pidiéndose lo que yá se ta faciendo», atayó.
Nesta llinia, mientres el debate de la PNL, el parlamentariu popular Andrés Ayala insistió en que yá existe un «compromisu» per parte del Gobiernu y de la ministra de Fomentu, Ana Pastor, de rematar a mediaos del añu 2015 les obres de la variante de Payares. Na so opinión, el Gobiernu «tien priesa» n’acabar estes obres, que, según dixo, supunxeron una inversión de más de «trés mil millones d’euros».