(EUROPA PRESS) El diputáu del PP na Xunta Xeneral, Matías Rodríguez Feito, pidió que’l Gobiernu asturianu invierta más fondos públicos na firma de convenios con aerollinies p’aumentar les conexones aérees del aeropuertu de Santiagu’l Monte, puesto que la situación actual «ta torgando’l desarrollu turísticu de la rexón».
Nuna nota prensa, criticó duramente la inacción del Gobiernu socialista de Javier Fernández nesta materia, y bien concretamente la xestión del conseyeru d’Industria, Graciano Torre, y del director xeneral de Turismu, Julio Zapico, que «nun faen el menor esfuerzu» por cambiar esta situación.
Feito recordó que l’asturiana ta ente les comunidaes colos númberos de visitantes estranxeros más baxos del país y la que menos tien de tol norte cantábricu. La causa, na so opinión, son «les insuficientes conexones internacionales» del aeropuertu. Ye necesario, dende’l so puntu de vista, aumentar les conexones, y especialmente con aeropuertos de primer orde mundial.
Exemplificó con dellos casos d’aerollinies, como’l d’Air Europa, que ta estudiando eliminar el so vuelu a Madrid y «nada se sabe de les negociaciones» pa evitalo; el de Volotea, que nun instaló la so base española n’Asturies nin creó un vuelu a Munich por «falta d’apoyu» del Gobiernu, o’l de Lufthansa, «que refugó la oportunidá d’abrir conexón con Frankfurt». «Spainair, Easyjet y Airfrance abandonaron les conexones con Madrid, Barcelona, Baleares y París», añadió.
Demandó «revitalizar el diálogu activu coles aerollinies y un analís pormenorizáu de les necesidaes del nuesu aeropuertu, collaborando col gobiernu d’España y con otros territorios de la UE». Siguimos sin tener información oficial sobre les intenciones del gobiernu de firmar más contratos de promoción turística coles aerollinies.
«Sin más alicientes económicos tememos que les compañíes nun van volar a Asturies porque les cuentes nun-yos cuadren», reivindicó’l diputáu, que considera «urxente y necesario» articular «mecanismos llegales afayadizos que xustifiquen destinar más dineru público a tal fin».