(EUROPA PRESS) La diputada del PP na Xunta Xeneral d’Asturies (JGPA) Susana López Ares, cargó esti martes contra la Conseyería d’Educación del Principáu d’Asturies por llendar en Primaria la elección de les asignatures de llibre configuración autonómica a les especialidaes de Llingua asturiana y lliteratura y a la de Cultura asturiana. A xuiciu del PP, el Principáu tendría de favorecer una ufierta más variada, como una segunda llingua estranxera pa los neños, daqué que se fai n’otres comunidaes autónomes.
Nuna rueda prensa ofrecida esti martes na Xunta Xeneral, López Ares dixo qu’esti asuntu ta xenerando munches quexes ente los padres asturianos, que ven les opciones pa escoyer llendaes a Llingua asturiana y lliteratura o a Cultura asturiana. Ante les protestes, según la parlamentaria, del PP, la conseyera ta respondiendo que se llenda a aplicar la Llei Orgánica pa la Meyora de la Calidá Educativa (Lomce). «Pero eso nun ye verdá», dixo López Ares.
La diputada del PP recordó’l «compromisu» del PP col asturianu y señaló que la llei impulsada pol Gobiernu central inclúi espresamente la posibilidá de que s’incorpore l’asturianu como asignatura de llibre configuración autonómica.
Sicasí, esa posibilidá nun pue facer que s’eliminen otres alternatives, argumentó López Ares. «El Principáu ta quitando a los padres la posibilidá d’escoyer otres materies, como una segunda llingua estranxera», llamentó.
D’esta manera, esclaró que lo qu’establez la Lomce ye que l’Asturianu seya una enseñanza «d’ufierta obligatoria pero d’elección voluntaria». Sicasí, tal como ta obrando’l Principáu, los padres vense obligaos a escoyelo porque nun hai más alternatives. A xuiciu del PP, el Gobiernu rexonal ta utilizando al asturianu «como escusa» pa nun impartir otres materies.
El PP tien previsto apelar a la conseyera d’Educación Ana González sobre esti asuntu, asina como a presentar les iniciatives parlamentaries que seyan necesaries. Pero amás va entamar una campaña divulgativa pa esplicar lo que diz «realmente» la Lomce.