El plan de tresporte a los llagos de Cuadonga batió’l récord de viaxeros desque se punxo en marcha en 2004, con más de 149.000 no que va d’añu. El serviciu branizu, qu’empezó’l 15 de xunetu y concluyó el pasáu xueves, movilizó a 131.633 persones, un 18% más que’l branu pasáu.
El Consorciu de Tresporte d’Asturies (CTA) escuerre con esti plan ordenar l’arribación a esti enclave del Parque Nacional de los Picos d’Europa y amenorgar les emisiones procedentes del tráficu, según les sos consecuencies negatives sobre la redolada. Pa ello, ciérrase’l pasu de turismos na carretera d’accesu a los llagos pel branu, dende les 08.30 hasta les 20:00 hores, y habilítase un serviciu alternativu d’autobuses, qu’opera dende les 09.00 hasta les 19.30 hores. Esta regulación nun afecta al santuariu de Cuadonga, al que se dexa aportar con total normalidá mientres tola xornada.
Los usuarios que lu prefieran pueden optar pol serviciu de taxis que punxo en marcha la cooperativa local de Cangues d’Onís Taxitur y que, coordináu colos buses danzadera, dexa realizar visites en vehículos d’hasta nueve places.
Tanto les tarifes de los autobuses como les de los taxis permanecieron conxelaes un añu más, con precios de 8 euros p’adultos y de 3,5 pa menores de 3 a 12 años, nel casu de los autobuses, y de 11 euros p’adultos y de 5 pa menores de 12 año si optar pol taxi.
Según les estimaciones del CTA, el plan puede evitar anguaño la presencia de 70.000 vehículos particulares na redolada de los llagos de Cuadonga, lo que demuestra la so importancia tantu dende’l puntu de vista medioambiental como de seguridá vial.
El plan volverá activase’l 3 d’avientu si les condiciones meteorolóxiques dexar.
El plan especial de tresporte a los llagos de Cuadonga tuvo activu anguaño mientres la Selmana Santa, la ponte del 1 de mayu y parte del branu; amás, va tar tamién n’avientu, mientres la ponte de la Constitución.
