El Gobiernu d’Asturies va recurrir ante’l Tribunal Supremu por que se paralice l’aplicación del Real Decreto 310/2016, de 29 de xunetu, pol que se regulen les evaluaciones finales d’Educación Secundaria Obligatoria (ESO) y Bachilleratu.
El conseyeru d’Educación y Cultura, Genaro Alonso, aportunó güei en que les reválides ruempen colos criterios pedagóxicos d’evaluación continua del alumnáu y llamentó que la superación de les pruebes tea venceyada al llogru del títulu académicu.
“Les reválides van aumentar el fracasu escolar y van suponer una torga innecesaria pal alumnáu, polo que van ser un factor de dificultá nel sistema educativu”, sorrayó.
Alonso tamién llamentó que’l Gobiernu de Mariano Rajoy, al igual que yá asocedió cola reválida de sestu de Primaria, cuestione y resabie de la figura del profesoráu d’aula, al recurrir a personal docente esternu pa dar validez a la prueba.
Amás, amestó qu’estes pruebes nun cunten col consensu de les autonomíes nin de la comunidá educativa y esixó al ministru d’Educación, Iñigo Méndez de Vigo, la celebración urxente d’una conferencia sectorial, una solicitú plantegada por toles comunidaes autónomes gobernaes pol PSOE.
Tocantes a la prueba esterna de 2º de Bachilleratu, que sustitúi a la Prueba d’Accesu a la Universidá (PAU), el conseyeru denunció que la so organización va suponer un importante costu pa les comunidaes autónomes.
