(EUROPA PRESS) El Conseyu de Gobiernu aprobó na so xunta d’esti miércoles destinar 16,4 millones a caltener 545 places residenciales pa persones mayores mientres dos años. Con esta cantidá prorrogaránse doce contratos con otros tantos centros, lo que va permitir caltener la ufierta del organismu autónomu Establecimientos Residenciales pa Vieyos d’Asturies (ERA).
Según esplicó en posterior rueda prensa’l voceru del Executivu, Guillermo martínez, esti acuerdu «ye una muestra más de que les polítiques sociales suponen una prioridá absoluta pal Gobiernu socialista».
Esplicó amás que l’ERA cuenta con 5.631 places, de les que 5.115 son residenciales (3.177, propies; 1.938, concertaes) y 516 (465, propies; 51, concertaes) correspuenden a centros de día.
Martínez esplicó qu’amás de la prórroga de contratos aprobada güei pol Conseyu de Gobiernu, l’ERA, sigue avanzando na so política d’equipamientos, de tal manera qu’esti añu va destinar a inversiones daqué más de siete millones.
Nesta apuesta poles polítiques sociales el voceru del Gobiernu enmarcó otru de los acuerdos adoptaos esti miércoles, como ye l’aprobación del un conveniu de collaboración ente la conseyería de Sanidá y Cáritas Diocesana d’Uviéu pa caltener un centru d’alcuentru y acoyida de 14 places destináu a persones con problemes de drogodependencia.
Pa ello, el Gobiernu va conceder a Cáritas una sovención de 106.300 euros. Martínez manifestó qu’esti conveniu va tar vixente mientres el 2014.
A lo último, el conseyu aprobó tamién que la conseyería de Bienestar Social sovencione con 20.000 euros a l’Asociación Bendición de Dios pal desarrollu del proyectu «Educación y enseñanza pal desarrollu integral de los neños y neñes d’escasos recursos de San Juan Alotenango», en Guatemala.