(EUROPA PRESS) El costu llaboral mediu por trabayador y mes (qu’inclúi les remuneraciones y les cotizaciones sociales) subió a 2.398,18 euros n’Asturies (2.474,40 nel restu del país) nel primer trimestre del añu, lo que supón un descensu del 1,1 por cientu sobre’l mesmu periodu del 2013, penriba de la media nacional onde esti índiz cayó un 0,2 por cientu, según datos publicaos esti martes pol Institutu Nacional d’Estadística (INE) y recoyíos por Europa Press.
La d’Asturies ye la cuarta mayor cayida porcentual interañal del costu llaboral, namás superada poles rexistraes en País Vascu (-1,8%), Comunidá Valenciana (-1,5%) y Cataluña (-1,4%).
Del total del costu llaboral, el costu salarial (qu’inclúi toles remuneraciones, tanto en metálicu como n’especie) algamó los 1.745,77 euros de media n’Asturies (1.805,76 euros n’España), un 1,8 por cientu menos que nel primer trimestre del 2013 (-0,2 por cientu nel restu del país).
La xornada de trabayu quedó en 146,8 hores pactaes, 131,8 efectives y 15,4 non trabayaes nel primer trimestre n’Asturies, perbaxo nos dos primeros casos de la media nacional (149,1 y 134,9 hores respectivamente) pero penriba del tercer datu (14,8 hores n’España).
L’INE informó amás de que nel primer trimestre del 2014 rexistráronse 466 vacantes d’empléu nel Principáu d’Asturies, lo que supón el 0,8 por cientu del total nacional (54.965)